Rusiya ABŞ-dən Boeing təyyarələrinin alınmasına icazə verilməsini istəyib
Rusiya, Ukrayna ilə atəşkəs əldə olunacağı təqdirdə, ABŞ-də dondurulmuş aktivlər hesabına Boeing təyyarələri almağa icazə verilməsini istəyib. Bildirilir ki, bu tələb Moskvanın sülh danışıqlarındakı ilkin şərti olmasa da, tərəflər arasında sanksiyaların yumşaldılması məsələlərinin müzakirəsinə daxil edilib.
Crossmedia.az xarici mənbələrə istinadən bildirir ki, təyyarə alışına dair mümkün razılaşma, döyüşlərin dayandırılması halında tətbiq olunan məhdudiyyətlərin tədricən azaldılması planının bir hissəsi kimi nəzərdən keçirilir.
ABŞ Dövlət Departamenti və Boeing bu məsələ ilə bağlı şərh verməkdən imtina edib.
Qeyd edək ki, ABŞ-də təxminən 5 milyard dollar dəyərində Rusiya aktivləri dondurulub. Ümumilikdə isə Qərb dövlətləri Rusiya Mərkəzi Bankının 280 milyard dollardan çox ehtiyatını bloklayıb, bunun əsas hissəsi Avropa İttifaqının nəzarətindədir.
Rusiya tərəfi, Qərb sanksiyalarından sonra təyyarə və ehtiyat hissələri baxımından ciddi çatışmazlıqlarla üzləşib. Bu səbəbdən ölkə daxilində istehsalı artırmaq və alternativ bazarlardan təminat yolları axtarmaq məcburiyyətində qalıb. Eyni zamanda, Rusiya əvvəllər Aeroflot-a qarşı sanksiyaların aradan qaldırılmasını və ABŞ ilə birbaşa uçuşların bərpasını da təklif edib.
Bu təşəbbüs, iki ölkə arasında sanksiyaların yumşaldılması və geosiyasi gərginliyin azaldılması istiqamətində mümkün bir addım kimi qiymətləndirilir.
Zəhra Ağayeva
19:01 16.04.2025
Oxunuş sayı: 1170
