Ali Xamenei: ABŞ-la danışıqlar diqqətlə izlənməlidir
İranın Ali Dini Lideri Ayətullah Əli Xamenei, ABŞ-la danışıqlarda əldə olunan irəliləyişi dəstəklədiyini bildirib, lakin nəticə barədə şübhələrini də gizlətməyib.
Crossmedia.az xarici mediaya istinadən bildirir ki, Xamenei çərşənbə axşamı Tehranda yüksək səviyyəli rəsmilərlə görüşündə bildirib ki, danışıqlarla bağlı nə həddindən artıq nikbin, nə də bədbin olmaq lazımdır. “İlk addımlar düzgün atılıb və düzgün şəkildə icra olunub. Bundan sonrakı proses diqqətlə izlənilməlidir,” – deyə o qeyd edib.
O, həmçinin qarşı tərəfin və İranın “qırmızı xətləri”nin aydın olduğunu vurğulayıb və əlavə edib: “Nəticəyə gəlinə bilər və ya gəlinməyə bilər, amma hər iki halda izləməyə dəyər.”
Xamenei rəsmiləri şənbə günü keçirilməsi planlaşdırılan ikinci mərhələ danışıqlara “ölkə məsələlərini bağlamamağa” çağıraraq bildirib: “Əlbəttə, onlara tam etibar etmirik – kimlə qarşı-qarşıya olduğumuzu bilirik. Lakin öz imkanlarımıza inamımız var.”
Digər tərəfdən, ABŞ-ın xüsusi nümayəndəsi Stiv Witkoff bildirib ki, qarşıdakı görüşlər əsasən uranın zənginləşdirilməsi və silahlanmanın təsdiqlənməsi məsələlərinə fokuslanacaq.
O qeyd edib ki, İranın 3,67%-dən artıq zənginləşdirməyə ehtiyacı yoxdur, lakin bəzi hallarda bu səviyyənin 60%-ə və ya 20%-ə çatdığı müşahidə olunur.
Witkoff ABŞ mətbuatına bildirib: “Bu, əsasən zənginləşdirmə proqramının və silahların – o cümlədən raketlərin və bomba mexanizminin – təsdiqlənməsi ilə bağlı olacaq.”
O, Prezident Trampın mənfi nəticə halında “alternativ” yollar tapılmalı olduğu fikrini təkrarlayaraq, təsdiqləmə prosesinin vacibliyini vurğulayıb.
Danışıqların harada keçiriləcəyi hələ də bəlli deyil. Əvvəlcə Romada keçiriləcəyi bildirilsə də, İran rəsmiləri danışıqların Ummanda davam etdiriləcəyini açıqlayıb.
İki ölkə arasında təxminən 50 ildir davam edən düşmənçilik fonunda bu görüşlər xüsusi əhəmiyyət kəsb edir. Tramp razılaşma əldə olunmaması halında İranın nüvə obyektlərinə hava zərbələri endiriləcəyini bildirir. İran isə yüksək dərəcədə zənginləşdirilmiş uran ehtiyatlarını əsas gətirərək nüvə silahı əldə etmək niyyətində ola biləcəyinə dair siqnallar verir.
Fatimə Nəbiyeva
16:10 16.04.2025
Oxunuş sayı: 7947
