Ermənistan anlamalıdır: "Sözlə sülhə nail olmaq mümkün deyil"
Antalya Diplomatik Forumunda keçirilən görüşlər fonunda Azərbaycan xarici işlər naziri Ceyhun Bayramovla erməni həmkarı Ararat Mirzoyan arasında baş tutan debat çoxlarının diqqətini idi. C.Bayramov çıxışında sülh üçün iki əsas məqamın- ATƏT-in Minsk Qrupunun ləğvinin və konstitusiya dəyişikliyinin şərt olduğunu bildirdi.
Onun qaldırdığı məsələlərə cavab olaraq Mirzoyan bildirib ki, məqsəd sülh sazişinin imzalanacağı yeri və günü müəyyənləşdirməkdir.
Ermənistanın "gözdən pərdə asmaq" üçün verdiyi bəyanatlar və açıqlamalar artıq bütün dünyaya məlumdur. Görünən odur ki, Ermənistan yenə də ənənəvi "nala- mıxa vurmaq" siyasətini davam etdirir.
Mövzu ilə bağlı politoloq Mütəllim Rəhimli Crossmedia.az-a açıqlama verib:
"Azərbaycanla Ermənistan arasında 17 bəndlik sülh sazişi üzərində razılaşma əldə olunub. Artıq hər iki tərəf bunu təsdiq edib. Lakin onun imzalanması üçün iki ciddi problem var. Bunlardan biri sülh sazişinin imzalanacağı yerin müəyyənləşdirilməsidir. İkincisi, bundan heç də sadə olmayan ATƏT-in Minsk Qrupunun ləğvi və Ermənistan Konstitusiyasına dəyişikliklərin edilməsidir. Birinci məsələ Azərbaycan və Ermənistandan asılıdır. Tərəflər bu məsələdə razılığa gələ bilməsə, üçüncü oyunçunun müdaxiləsinə ehtiyac ola bilər".
Müsahibimizin sözlərinə görə, ikinci məsələ İrəvanın özündən asılıdır: " Əgər Ermənistan, doğrudan da, sülh müqaviləsini imzalamaq istəyirsə, Konstitusiyasına dəyişiklik etməli və hazırda ölü təşkilat olan ATƏT Minsk Qrupunun ləğvinə razilaşmalıdır. Əks hal Ermənistanın əməli ilə arzusu arasında böyük fərqin olduğunu üzə çıxaracaq. Artıq sözlə sülhə nail olmaq mümkün deyil. Bunu Ermənistan anlamalıdır. Ona görə də əməli addımlar atmaqla sülh istəyini sübut etməlidir".
Ayhan Ağarzayev
15:03 14.04.2025
Oxunuş sayı: 1278
