Tramp illik tibbi müayinədən keçdi
ABŞ Prezidenti Donald Tramp ikinci dəfə prezident seçildikdən sonra ilk dəfə illik tibbi müayinədən keçib. Müayinə Vaşinqtonda yerləşən Walter Reed Hərbi Hospitalında aparılıb.
Crossmedia.az xəbər verir ki, bu barədə CBS News məlumat yayıb.
Bildirilir ki, Tramp xəstəxanada 4 saatdan bir az çox vaxt keçirib. Bu da Ağ Ev tərəfindən əvvəlcədən planlaşdırılmış 4 saat 45 dəqiqədən az olub.
Məlumatda qeyd edilir ki, müayinənin nəticələri dərhal açıqlanmayıb. Lakin Tramp özü bildirib ki, həkimi bu nəticələri bazar günü ictimaiyyətə təqdim edəcək.
Qeyd edək ki, 78 yaşlı Tramp ikinci dəfə prezident seçiləndə ABŞ tarixində vəzifəyə gələn ən yaşlı prezident olub. Onun son geniş tibbi müayinəsi 2023-cü ilin sentyabrında baş tutub. Həmin vaxt da ictimaiyyətə sadəcə bəzi ümumi məlumatlar verilib. Tramp deyib ki, bu dəfəki müayinə zamanı o, həm də yaddaş və düşüncə ilə bağlı testlərdən keçib.
Tibbi ekspert Dr. Selin Qounder bildirib ki, prezidentin müayinəsi sadə həkim müayinəsi kimi deyil: "Adətən belə müayinələr zamanı həyat göstəriciləri yoxlanılır, ürək, ağciyər, qarın müayinəsi edilir, xolesterin, şəkər, böyrək və qaraciyərlə bağlı analizlər götürülür. Əgər əvvəldən hansısa sağlamlıq problemi olubsa, əlavə olaraq EKG, rentgen, ultrasəs və ya exokardioqram da edilə bilər".
Dr. Qounder əlavə edib ki, prezidentin belə bir müayinəsi əslində bir növ ictimaiyyətə göstərmək üçün təşkil olunur: "Bu, sanki tibbi bir PR tədbiridir. Məqsəd prezidentin sağlam olduğunu göstərmək və insanları buna inandırmaqdır".
Məlumata görə, Tramp 2023-cü ilin noyabrında öz həkimi Brüs Aronvaldin sentyabr müayinəsi ilə bağlı yazdığı məktubu paylaşıb. Məktubda Trampın ümumi sağlamlığının əla olduğu və idrak testlərindən yüksək nəticə aldığı qeyd olunurdu. Lakin məktubda onun qan təzyiqi, çəkisi və ya qəbul etdiyi dərmanlarla bağlı dəqiq məlumatlar yer almayıb.
Xatırladaq ki, 2024-cü ilin iyulunda Pensilvaniya ştatının Batler şəhərində keçirilən seçki mitinqində Tramp qulağından güllə yarası alıb. Hadisədən sonra o, özünü yaxşı hiss etdiyini və heç bir ciddi fəsad qalmadığını açıqlamayıb. O vaxt onun birinci prezidentlik dönəmində həkimi olmuş və hazırda konqresmen olan Ronni Cekson da Trampın xəstəxana sənədlərini yoxladığını və onun vəziyyətinin yaxşı olduğunu deyib.
Tramp prezident olduğu vaxt sonuncu dəfə 2020-ci ilin iyununda illik tibbi müayinədən keçib. Həmin müayinə barədə yayılan rəsmi məlumatda onun çəkisinin 244 funt (təxminən 110 kiloqram), qan təzyiqinin isə 121/79 olduğu bildirilib.
Fatimə Məmmədova
15:50 13.04.2025
Oxunuş sayı: 5937
