Ağciyər xərçəngindən əməliyyat olunan Roma Papası ilk dəfə göründü
Roma Papası XIV Leo ağciyər xərçəngi səbəbindən keçirdiyi əməliyyatdan sonra ilk dəfə ictimaiyyət qarşısına çıxaraq Vatikanda ənənəvi bazar günü duasına rəhbərlik edib.
Crossmedia.az xəbər verir ki, bu barədə “Vatican News” məlumat yayıb.
Oktyabrın 17-də xəstəxanadan buraxılan 71 yaşlı pontifik Müqəddəs Pyotr meydanına baxan pəncərədən minlərlə zəvvarı salamlayıb.
Papa əməliyyatı həyata keçirən həkimlərə və ona dəstək göstərən insanlara təşəkkürünü bildirib.
O, yaşadığı bu təcrübənin xəstəlikdən əziyyət çəkən insanları daha dərindən anlamasına kömək etdiyini vurğulayıb. XIV Leo Tanrının köməyi və inanclı insanların duaları ilə fəaliyyətini tədricən bərpa edəcəyini söyləyib.
Qeyd edək ki, oktyabrın 13-də Romanın “Gemelli” xəstəxanasında Papanın ağciyərində aşkar edilən törəmənin çıxarılması üçün cərrahi əməliyyat keçirilib.
Təxminən 90 dəqiqə davam edən əməliyyat zamanı onun sağ ağciyərinin aşağı payı çıxarılıb. Histoloji müayinə nəticəsində ağciyər adenokarsinoması diaqnozu təsdiqlənib.
Əməliyyatı həyata keçirən cərrah Stefano Marqaritora bildirib ki, müdaxilə ağırlaşmasız başa çatıb və Papanın əməliyyatdan sonrakı bərpa prosesi qənaətbəxşdir.
Həkim noyabrın 6–17-də Uruqvay, Argentina və Peruya planlaşdırılan səfərin baş tutmasına hazırda tibbi baxımdan maneə görmədiyini qeyd edib.
Vatikan daha əvvəl pontifikin sağalması üçün oktyabrın 20-dək nəzərdə tutulan görüşlərini ləğv etmişdi.
XIV Leo çıxışında insanları dürüst olmağa, qorxu və ikiüzlülükdən uzaq durmağa, xeyirxah əməllər görməyə çağırıb.
19:39 18.10.2026
Oxunuş sayı: 59
