NATO-dan Rusiya ilə bağlı xəbərdarlıq: Kosmosa nüvə silahı yerləşdirə bilərlər
NATO Baş katibi Mark Rutte Rusiyanın telekommunikasiya peyklərini hədəf almaq məqsədilə kosmosa nüvə silahı yerləşdirmək planları ilə bağlı xəbərdarlıq edib.
Crossmedia.az xəbər verir ki, “Welt am Sonntag” qəzetinə müsahibəsində Rutte bildirdiyinə görə, Moskvanın anti-peyk silahları üzərində işləməsi ciddi narahatlıq doğurur. O, bu silahların həm müdafiə, həm də gündəlik həyat üçün həyati əhəmiyyət daşıyan minlərlə peyki təhlükə altına ala biləcəyini deyib.
Rutte vurğulayıb ki, Rusiyanın belə addımları 1967-ci il tarixli və özü də tərəf olduğu Xarici Kosmos müqaviləsini, Ay və digər göy cismlərinin hərbiləşdirilməsini və orbitə nüvə silahı yerləşdirilməsini qadağan edən razılaşmanı pozmuş olar.
NATO rəhbəri Rusiyanın mövcud texnologiyasının Qərblə müqayisədə zəif olduğunu desə də, orbitdə nüvə başlıqları və ya anti-peyk silahlarının yerləşdirilməsinin “son dərəcə sabitliyi pozan bir inkişaf” olacağını bildirib.
O, NATO-nun kosmosda da, quruda, havada və dənizdə olduğu kimi güclü çəkindirmə və müdafiə qabiliyyətinə sahib olmasının vacibliyini qeyd edib: “Son illərdə kosmos daha sıx, təhlükəli və proqnozlaşdırılması çətin bir mühitə çevrilib. Rəqabət burada da çox sərtdir”, – deyə Rutte bildirib.
Mədinə Cəlilova
16:48 13.04.2025
Oxunuş sayı: 1392
