Sosioloq narazıdır: “Məzun tədbirlərində cinayət aləmini təbliğ edən musiqilərin səsləndirilməsi müşahidə olunur”
Son illər bəzi məktəblərdə son zəng tədbirləri ilə bağlı tətbiq olunan qadağalar cəmiyyətdə geniş müzakirələrə səbəb olub. Xüsusilə də vals və xarici rəqs növlərinə qoyulan məhdudiyyətlər diqqət çəkir. Bəs bu cür qadağalar nəyi ehtiva edir?
Məsələ ilə bağlı Crossmedia.az-a açıqlama verən sosioloq Üzeyir Şəfiyev bildirib ki, son illər bəzi məzun tədbirlərində cinayət aləmini təbliğ edən musiqilərin səsləndirilməsi müşahidə olunur.
" Uşaq və yeniyetmələrin psixologiyası hələ tam bərkiməyib. Uşaq və yeniyetmələr sağlam mühitdə sosiallaşmalıdırlar. Söhbət cinayət aləminin həyat tərzini və qəhrəmanlarını təbliğ edən bəzi rəqs mahnılarından gedir. Əlbəttə ki, musiqi dünyəvi bir dəyərdir, mədəniyyət daşıyıcısıdır. Amma burada söhbət bəşəri dəyərlərə əsaslanan sağlam musiqidən getmir. Söhbət, müəyyən hallarda, xarici ölkələrin ideoloji təsirini təbliğ edən, gənclərin mənəvi dünyasını zədələyə biləcək musiqilərdən gedir”.
Sosioloq qeyd edib ki, uşaqların və yeniyetmələrin psixologiyası hələ tam formalaşmayıb və onların sağlam mühitdə sosiallaşması vacibdir. Bu baxımdan, musiqi də daxil olmaqla, sosial media, ədəbiyyat və informasiya vasitələrinin təsiri nəzərə alınmalıdır: “Bəzən bəzi musiqi əsərlərində müəyyən xarici qüvvələrin missioner fəaliyyəti özünü göstərə bilər. Belə mahnılar Azərbaycan cəmiyyətinin təhlükəsizliyinə təhdid yarada bilər. Ona görə də məzun günlərində bu cür musiqilərin səsləndirilməsi yolverilməzdir”.
Sosioloq əlavə edib ki, bu cür hallar əvvəllər də bir neçə dəfə müşahidə olunub . Onun fikrincə, məzun günlərində milli musiqilərə, vətənpərvərlik ruhunda olan əsərlərə üstünlük verilməlidir: “Milli dəyərləri, vətənpərvərlik ruhunu, dövlətçilik şüurunu aşılayan musiqilər məzun tədbirlərinin əsasını təşkil etməlidir. Bu, gənclərin əxlaqi və mənəvi inkişafına xidmət edər”.
Sonda isə o, bu musiqilərin cəmiyyətə mənfi təsir etdiyini vurğulayıb: “Söhbət daha çox kriminal aləmdən bəhs edən mahnılardan gedir. Əlbəttə ki, onlar yolverilməzdir. Olmamalıdır. Çünki bu, gənclərin sosiallaşmasına, mənəvi-əxlaqi dəyərlərinin formalaşmasına mane olan işlərdir. Bəzən olur ki, xarici musiqilər yad, əcnəbi trendləri təbliğ edir. B,u özünü Halloween kimi bayramlarda da göstərir”.
Fatimə Məmmədova
18:25 12.04.2025
Oxunuş sayı: 4368
