Sosium

"Gənclər çox vaxt standart və qeyri-peşəkar CV-lər hazırlayırlar" -EKSPERT

Gənclərin əmək bazarına inteqrasiya etməsi zamanı qarşılaşdıqları bir sıra problemlərdən biri də təcrübə məsələsidir. Əsas çətinlik lazımi təcrübə olmadıqda ortaya çıxır və təcrübə tələbi ilə üz-üzə qala bilirlər. Bunlar gəncləri əmək bazarında fəaliyyətinə maneə olur və iş tapmaqlarına mənfi təsir göstərir. HR mütəxəssisləri işə götürmə zamanı belə hallarla tez-tez rastaşırlar. Gənclərdə ya CV problemi, ya da təcrübə çatışmazlığı olur.
Bu barədə Crossmedia.az saytına danışan İnsan resursları üzrə ekspert İlkin Məcidov deyir ki, yeni məzunlar və ya tələbələr çox zaman iş təcrübəsinə sahib olmurlar:
“HR-lar isə müəyyən sahələrdə işəgötürənlərin tələbinə uyğun olaraq minimum təcrübə axtarırlar. Bu ziddiyyət işə qəbul prosesində çətinlik yaradır. Bəzi gənclər könüllü fəaliyyətlərini və ya təcrübə proqramlarında iştiraklarını CV-də vurğulamadıqları üçün onların potensialı HR-lar tərəfindən tam görünmür.”
Ekspert bildirib ki, gənclər çox vaxt standart və qeyri-peşəkar CV-lər hazırlayırlar: “CV-də yazı dili qüsurlu olur, struktur natamam olur, fotoşəkil uyğun olmur və ya CV çox uzun səhifələrlə yüklənmiş olur. Bir çox gənc fərdiləşdirilmiş CV hazırlamır, yəni müraciət etdiyi vəzifəyə uyğun olaraq öz CV-lərində dəyişiklik etmirlər. Gənclər çox zaman bacarıqlarını (ünsiyyət, komanda işi, problem həll etmə və s.) CV-də qeyd etmirlər və ya onları sübut edə biləcək nümunələr təqdim etmirlər. HR-lar bu cür bacarıqları müsahibə zamanı öyrənməyə çalışsalar da, CV-də bu məlumatların olmaması ilkin seçim mərhələsində gənclərin ələnməsinə səbəb ola bilər. Bəzi gənclər təcrübələri və bacarıqları kifayət etməsə də, yüksək maaşlı vəzifələrə müraciət edirlər və bu HR-lar üçün uyğunsuzluq yaradır. Eyni zamanda, gənclər CV-lərini bir çox sahəyə uyğunlaşdırmadan eyni formada müxtəlif elanlara göndərirlər, bu isə diqqətsizlik və məsuliyyətsizlik kimi dəyərləndirilə bilər.”
Nurcan İsmayılova