Özgür Özəlin yenidən CHP sədri seçilməsi bu ŞOK siqnalları verir - Kılıçdaroğludan sonra...
“Özgür Özəlin yenidən CHP (Cümhuriyyət Xalq Partiyası) sədri seçilməsi bir neçə cəhətdən əhəmiyyətli siqnallar verir və ana müxalifət partiyası daxilində müəyyən dəyişikliklərin ola biləcəyinə işarə edir”.
Bu fikirləri Yaxın Şərq üzrə ekspert Vüqar Zifəroğlu deyib.
Ekspert vurğulayıb ki, Özgür Özəl artıq partiya daxilindəki “dəyişiklik” çağırışlarının müəyyən mənada simasına çevrilib:
“Onun yenidən sədr seçilməsi bu kursun davam edəcəyini göstərir. Bu mənada Özəlin yenidən seçilməsi ilə əlaqədar bəzi ehtimallar irəli sürmək olar. Məsələn, partiyada nəsil dəyişikliyi və gəncləşmənin aparılacağı gözləniləndir. Özəl partiyada yeni simalara yer verəcəyini, yaşlı, uzun müddət rəhbərlikdə olan şəxslərlə yollarını ayırmaq niyyətində olduğunu göstərmişdi.
Başqa bir məqam təşkilati strukturların yenilənməsi ilə bağlı ola bilər. CHP-nin yerli təşkilatlarının daha aktiv və çevik hala gətirilməsi, ələlxüsus son baş verən proseslər fonunda gözləniləndir.
Koalisiya siyasətində də çevikliyə diqqət artırılacağını proqnozlaşdırmaq mümkündür. Özəl daha çevik və praqmatik müxalifət siyasəti vəd edir; sadəcə “mühafizəkar seçməni qazanmaq” xətti ilə kifayətlənməyib, daha geniş sosial təbəqələrlə dialoq qurmağa çalışır.
Lakin CHP və ümumilikdə ana müxalifətin durumu heç də birmənalı deyil. Müxalifətdə birlik problemi qalmaqdadır. “Altılı masa” təcrübəsindən sonra seçici müxalifət arasında daha ciddi əməkdaşlıq və koordinasiya gözləyir.
Eyni zamanda partiyada ciddi ideoloji kimlik problemi görülməkdədir. CHP-nin sol mərkəz və ya sosial-demokrat xəttə qayıtması barədə daxili müzakirələr güclənir. Bu kimlik məsələsi partiyanın gələcək istiqamətini müəyyən edəcək əsas amillərdəndir.
Liderlik probleminin isə qismən də olsa arxada qaldığını söyləyə bilərik. Kılıçdaroğlunun gedişindən sonra Özəlin daha çevik və dialoqa açıq lider kimi önə çıxması partiya daxilində bir dinamizm yaradıb.
Hazırda gözləntilər əsasən bələdiyyə seçkilərindəki uğurun davam etdirilməsi, daha konkret və gündəlik sosial problemlərlə bağlı siyasətlərin hazırlanması və geniş ictimai təbəqələrlə dialoqun gücləndirilməsi yönündədir”. (müsavat)
17:29 06.04.2025
Oxunuş sayı: 14430
