Sosial Medianın Təhlükəsizliyi və Peşəkar Kadr Hazırlığı Tələbləri
Crossmedia.az-ın budəfəki qonağı sosioloq Hüseyin İbrahimovdur. O, sosial medianın təhlükəsizliyinin təmin olunmasının müasir cəmiyyət üçün kritik əhəmiyyət kəsb etdiyini vurğulayıb.
--Sosial medianın sürətlə inkişaf etdiyi son illərdə bu platformaların təhlükəsizliyinin təmin olunması sizcə nə üçün bu qədər vacibdir?
Sosial media bugünlərdə həyatımızın ayrılmaz bir hissəsidir. O, ailə institutundan tutmuş ayrı-ayrı özəl kanallara qədər bir çox geniş sahəni əhatə edir. Son 10 illikdə ölkəmizdə sosial medianın sayı daha da artmışdır. Və insanlar ilkin məlumatları daha çox ənənəvi mediadan deyil, məhz sosial mediadan alırlar. Bu baxımdan onun təhlükəsizliyinin qorunması olduqca vacib addımlardandır. Nəzərə almaq lazımdır ki, sosial medianın digər ənənəvi mediadan fərqi olaraq kiber təhlükəyə məruz qalma ehtimalı daha çoxdur. Bu baxımdan onun qorunması və təhlükəsizliyinin təmin edilməsi olduqca vacibdir.
-Sosial media sahəsində mütəxəssis çatışmazlığını nəzərə alaraq, bu sahədə peşəkar kadr hazırlığını artırmaq üçün hansı addımlar atılmalıdır?
Qeyd etmək lazımdır ki, birinci növbədə sosial media sahəsində məşğul olan insanlar çox ciddi mütəxəssislərlə əhatə olunmalıdır. Bu sahədə çox ciddi mütəxəssislər olmalıdır. Saytın qorunması hücumlardan qorunması məsələsində, xüsusən də müasir hibrid informasiya müharibəsi zəminində onun təhlükəsizliyinin təmin edilməsi zəminində mütəxəssislərin bu sahədə olmasına geniş ehtiyac duyulur. Düzdür, kiber təhlükəsizlik sahəsində müxtəlif informasiya və məlumatlara yiyələnmiş gənclərimiz çoxdur, ancaq onlar daha çox biz görürük ki, bank sistemində, müxtəlif dövlət orqanlarında işləyirlər və onların sayı da azdır. Ümumiyyətlə, kiber təhlükəsizliyi ilə bağlı ölkəmizdə idarə də var. Ancaq yaxşı olardı ki, gələcəkdə jurnalistika sahəsində, xüsusən də jurnalist yetişdirən ali təhsil müəssisələrində bu sosial medianın təhlükəsizliyinin təmin edilməsi istiqamətində əlavə ixtisaslar açılsın. Məsələn: jurnalist sosial media təhlükəsizliyinin təminatı kafedrası və yaxud kiber təhlükəsizliyin jurnalistikada təminatı ixtisası və s. Bu kimi ixtisaslar güclü jurnalist kadrlarının hazırlanmasına səfərbər olsunlar. Və qeyd etmək lazımdır ki, bugün hətta böyük qlobal saytlar və sosial medialar var ki, kənarda onlar özləri də kiber hücumlara məruz qalırlar. Belə olan zaman nəzərə almalıyıq ki, ölkəmizdə yenicə formalaşmış, son onillikdə daha sürətlə formalaşmış sosial mediada bugünlərdə boşluqlar çoxdur. İstər saytların təhlükəsizliyi baxımından, istərsə də qorunması baxımından bu kimi məsələlər göstərir ki, orada mütəxəssislərin olmasına çox böyük ehtiyaclar vardır.
Zeynəb Yunuszadə
17:35 05.04.2025
Oxunuş sayı: 9589
