Gənclərin ölkədən getməsinə səbəb olan amillərdən biri də peşəkar inkişaf problemidir - EKSPERT
Müxtəlif məqsədlər ilə ölkəni tərk edən gənclər sayı getdikcə, artır. Bu səbəblərə təhsil almaq( bakalavr, magistr, doktorantura), işləmək, vətəndaşlıq əldə etmək, karyera qurmaq və başqaları aiddir. Lakin həmin gənclər arasında sonradan ölkəyə qayıtmaq istəyənlərin sayı getdikcə, azalıb.
Bu fikirləri Crossmedia.az-a açıqlamasında, təhsil eksperti Vusalə Ağabəyli bildirib.
Onun dediklərinə əsasən, gənclərin ölkəyə qayıtmama səbəblərindən ən başda sosial-iqtisadi vəziyyət dayanır. Vakant iş yerləri, işə qəbul qaydaları və bütün prosesləri, uğurla tamamlamış gəncə verilən əməkhaqqı bu proses ilə təzad təşkil edir.
İndiki nəsil gəncləri əvvəlki illərdən çox fərqlənir. Yaxın keçmişdə gənclər təyinat üzrə işlə təmin edilirdilər, I Qarabağ müharibəsi və ondan sonrakı dövrdə isə hamı boşluğa düşmüşdü, kim harda necə iş tapdı işləyirdi. İndiki gənclərin əksəriyyətində isə, daha tənqidi təfəkkür formalaşır.
Ekspert qeyd edib ki, təhsilə başlamadan öncə, ixtisas seçirlər, həmin ixtisasın perspektivini təhlil edirlər və təhsil illərinin ilk pillələrindən harada işləyəcəkləri barədə düşünürlər. Normal yaşayış, normal həyat üçün maddi rifah önəm daşıyır.
İqtisadi amillərdən başqa, həmçinin, peşəkar inkişaf amili də gənclərin qayıtmama səbəblərindəndir. Azərbaycanda bəzi sahələrdə müasir texnologiya və yeniliklərin tətbiqində gecikmələr müşahidə olunur. Gənclərin təhsil aldıqları sahəyə uyğun iş yerlərinin hələ də mövcud olmaması və xarici ölkələrdə daha çox peşəkar inkişaf və yüksəliş imkanlarının olması kimi amillər də vacib məsələlərdir.
O cümlədən də, bəzən fərqli ənənələrlə təhsil alıb gəlmiş gənc artıq Azərbaycan mühitindəki bir çox ənənələrə uyğunlaşmır və ya qayıtdıqdan sonra cəmiyyətin sosial və mədəni tələblərinə uyğunlaşmaqda çətinlik çəkir. Bəzən isə , xaricdə qazandıqları həyat tərzindən, fərdi azadlıqların üstün olduğu mühitdən imtina etmək istəmirlər.
Müsahib vurğulayıb ki, bəzi hallarda tanışlıq və digər məsələlərin iş tapmaqda rol oynaması, bilik və bacarıqlara görə deyil, şəxsi əlaqələrə görə karyera yüksəlişi olması və ya idarəetmə sistemində yeniliklərə və fərqli düşüncələrə müqavimət göstərilməsi də gənclərin önünü kəsən amillərdəndir.
Həbib Qasımov
16:48 05.04.2025
Oxunuş sayı: 886
