Gürcüstan parlamentinin sədri xarici diplomatları daxili işlərə qarışmamağa çağırdı
Gürcüstan parlamentinin sədri Şalva Papuaşvili ölkədə akkreditə olunmuş bütün səfirləri Vyana Konvensiyasının diplomatik əlaqələrə dair müddəalarına riayət etməyə və dövlətin daxili işlərinə qarışmamaqla bağlı beynəlxalq öhdəlikləri yerinə yetirməyə çağırıb.
Crossmedia.az bildirir ki, o, bu barədə keçirdiyi brifinqdə bildirib.
Papuaşvili Fransanın səfirinin Gürcüstandakı siyasi böhranla bağlı səsləndirdiyi fikirlərə münasibət bildirərək qeyd edib ki, bir diplomatik nümayəndənin dövlətin daxili işlərinə qarışması beynəlxalq hüququn pozulması deməkdir. Onun sözlərinə görə, Fransa və bir sıra digər səfirliklər ölkədəki radikal qüvvələri açıq şəkildə dəstəkləyir.
“Mən dəfələrlə Fransanın səfirinin açıqlamalarına cavab vermişəm. Onların radikal qruplara göstərdiyi açıq dəstəyi görürük. Fransanı və digər diplomatik nümayəndəlikləri 31 mart tarixində parlament binasına edilən hücumu qınamağa və bu cür hərəkətlərdən uzaq durmağa çağırıram”, – deyə Papuaşvili bildirib.
O, o cümlədən Fransa səfiri olmaqla bütün diplomatları Vyana Konvensiyasının 41-ci maddəsinə əməl etməyə və qəbul edən ölkənin suverenliyinə hörmətlə yanaşmağa çağırıb. “Təəssüf ki, bəzi diplomatik nümayəndəliklər beynəlxalq hüququn məhdudiyyətlərini nəzərə almır və ölkənin daxili proseslərinə müdaxiləni mümkün sayırlar. Onların parlamentə və məhkəmə sisteminə qarşı səsləndirdiyi fikirlər yolverilməzdir”, – deyə spiker əlavə edib.
Fidan Xəlilova
14:57 04.04.2025
Oxunuş sayı: 7083
