Millət vəkili: "Ermənistan verdiyi açıqlamaları konkret addımlarla təsdiqləsə, proses irəliləyə bilər"
Ermənistan parlamentinin spikeri Alen Simonyan bildirib ki, İrəvanla Bakı arasında sülh sazişinin imzalanması prosesi dalana dirənməyib.
"Prosesin dalana dirəndiyini düşünmürəm. Ola bilsin ki, bizim saziş imzalamaq təklifimiz Azərbaycan tərəfi üçün bir qədər gözlənilməz olub", - o qeyd edib.
A.Simonyanın sözlərinə görə, hər iki ölkənin öz taleyini müstəqil həll etmək üçün kifayət qədər gücü var.
Məlum olduğu kimi, Azərbaycan Xarici İşlər Nazirliyi martın 13-də Ermənistanla sülh sazişi üzrə danışıqların bitməsi ilə bağlı bəyanat yayıb. Bəyanatda Azərbaycan və Ermənistan arasında sülh və dövlətlərarası münasibətlərin qurulması haqqında Saziş layihəsinin mətni üzrə danışıqların yekunlaşdığı qeyd olunub.
Eyni zamanda, Azərbaycan dəfələrlə bəyan edib ki, sülh sazişinin imzalanması üçün Ermənistan iki şərti yerinə yetirməlidir: Ermənistan Konstitusiyasındakı Azərbaycanın suverenliyi və ərazi bütövlüyünə qarşı iddiaları aradan qaldırmalı, eləcə də ATƏT-in Minsk qrupunun və aidiyyəti strukturlarının buraxılmasını dəstəkləməlidir.
Mövzu ilə bağlı Crossmedia.az-a Milli Məclisin deputatı Müşfiq Məmmədli açıqlama verdi.
O bildirib ki, danışıqlar prosesində rəsmi İrəvan beynəlxalq aktorlarla bağlı gözləmə mövqeyi tutmuşdu: "Bu konteksdə xüsusilə ABŞ-də keçirilmiş prezident seçkilərini nəzərə almaq lazımdır. Görünür, Ermənistan öz havadarlarına güvənirdi. Lakin sonrakı proseslər onu daha konstruktiv mövqe tutmağa məcbur etdi. Bu müddət ərzində demək olar ki, həm Azərbaycan, həm də Ermənistan tərəfindən verilən bəyanatlarda əsas məsələlərin razılaşdırıldığı açıqlandı.
M.Məmmədli fikrincə,Azərbaycan hər zaman sülh gündəmini ön planda saxlasa da, Ermənistan özünü etibarsız tərəfdaş kimi aparır: "Azərbaycan Prezidenti İlham Əliyevin də bu barədə fikirləri var. Ölkə rəhbəri vurğulayıb ki, Ermənistana güvənmək olduqca çətindir. Baş nazirin verdiyi bir-birini təkzib edən açıqlamalar da bunu sübut edir. Bu baxımdan, Ermənistanın sülh prosesində nə dərəcədə səmimi olduğu sual altındadır".
Deputat, həmçinin vurğulayıb ki, hazırda "top" Ermənistandadır: "Çünki Azərbaycan həmişə öz verdiyi sözün arxasında dayanıb və sülh prosesini irəlilətmək üçün bütün mümkün addımları atıb. Əgər Ermənistan verdiyi açıqlamaları konkret addımlarla təsdiqləsə, proses irəliləyə bilər. Əks halda, ziddiyyətli mövqe davam edərsə, məsələlərin həlli daha da çətinləşəcək və uzanacaq".
Xumar Emilqızı
15:30 25.03.2025
Oxunuş sayı: 1019
