Meksikanın tanınmış muzeyində Novruz təntənəsi
Azərbaycanın Meksika Birləşmiş Ştatlarındakı səfirliyinin təşkilatçılığı və Meksikanın məşhur Milli Antropologiya və Tarix İnstitutunun nəzdində fəaliyyət göstərən, XVI əsrə aid memarlıq abidəsi olan Milli Dünya Mədəniyyətləri Muzeyinin (“Museo Nacional de las Culturas del Mundo”) dəstəyi ilə muzeyin mərkəzi meydanında “Novruz, Bahar Bayramı” adlı bayram şənliyi təşkil edilib.
Crossmedia.az xəbər verir ki, muzeyin binası atseklərin qədim paytaxtı Tenoçtitlan şəhəri yerləşdiyi hissədə tikilib, Meksika Prezident Sarayının memarlıq ansamblının bir hissəsidir. Tədbirdə Milli Dünya Mədəniyyətləri Muzeyinin direktoru Aleksandra Qomez Kolorado, Meksika Xarici Əlaqələr Nazirliyinin Avropa Baş idarəsinin rəisi Oktavio Trip, Meksikada akkreditə olunmuş diplomatik korpusun nümayəndələri, KİV nümayəndələri, Azərbaycanın yaxın dostları və yerli ictimaiyyət iştirak edib.
A.Q. Kolorado, muzeyin Azərbaycan xalqının milli mədəniyyətini və dəyərlərini tərənnüm edən Novruz bayramına həsr edilmiş tədbirə ev sahibliyi etməsindən məmnunluğunu ifadə edərək, bu kimi tədbirlərin xalqları birləşdirdiyini, müxtəlif mədəniyyətləri və adət-ənənələri yaxından tanımaq imkanı yaratdığını, insanlar arasında qarşılıqlı anlayış və hörmətin dərinləşməsinə töhfə verdiyini qeyd edib.
Ardınca çıxış edən Meksika Xarici Əlaqələr Nazirliyinin Avropa Baş idarəsinin rəisi Oktavio Trip, Səfirliyin ölkəmizin mədəniyyətini və adət-ənənələrini tanıtmaq istiqamətindəki fəaliyyətini təqdir edərək, belə tədbirlərin xalqlar arasında qarşılıqlı anlaşma və əməkdaşlığı gücləndirmək üçün əhəmiyyətli bir platforma olduğunu vurğulayıb.
Səfir M.Talıbov Azərbaycanın qədim və zəngin mədəni irsini təmsil edən Novruz bayramı haqqında ətraflı məlumat verib. O, həmçinin, Novruz bayramının UNESCO tərəfindən qeyri-maddi mədəni irs siyahısına daxil edildiyini və 23 fevral 2010-cu ildə BMT Baş Məclisi tərəfindən martın 21-i tarixinin “Beynəlxalq Novruz Günü” olaraq qəbul edildiyini xüsusi olaraq qeyd edib.
Tədbir çərçivəsində, Novruz bayramına aid müxtəlif adət-ənənələrə həsr olunmuş sərgi təşkil edilib, Azərbaycanın milli mətbəxinin ləziz nümunələri təqdim olunub, həmçinin milli rəqs nümunələri nümayiş etdirilib və iştirakçılarla birgə qədim Novruz adətləri əyani olaraq göstərilib. İştirakçılara Azərbaycan rəqslərinin elementlərini öyrənmək imkanı yaradılıb, tədbirin qonaqları birliyin və dostluğun rəmzlərindən biri olan yallı rəqsinin ifasına qatılıb. Tədbirə üç minədək meksikalı və şəhərin xarici qonaqları qatılıb.
10:23 18.03.2025
Oxunuş sayı: 625
