ABŞ Ukraynaya kəşfiyyat və hərbi yardımını bərpa etdi
Ağ Ev, Ukraynanın 30 günlük atəşkəsə razılıq verməsinin ardından ABŞ-ın bu ölkəyə kəşfiyyat dəstəyi və müdafiə yardımı axınını yenidən başladığını təsdiqləyib.
Crossmedia.az xarici KİV-ə istinadən verdiyi xəbərə görə, Milli Təhlükəsizlik Şurasının (NSC) sözçüsü Ceyms Hyuit Anadolu Agentliyinə açıqlamasında bildirib ki, Səudiyyə Ərəbistanında keçirilən ABŞ-Ukrayna görüşlərində mühüm irəliləyiş əldə olunduqdan sonra Vaşinqton Kiyevə hərbi dəstəyini bərpa etməyə qərar verib.
Qeyd edək ki, ABŞ-ın Ukraynaya kəşfiyyat və hərbi yardımları fevralın 28-də Prezident Donald Tramp, Vitse-prezident JD Vens və Ukrayna Prezidenti Volodimir Zelenski arasında Oval kabinetdə baş verən mübahisədən sonra müvəqqəti olaraq dayandırılmışdı. Tramp həmin görüşdə Zelenskinin “Amerika xalqına hörmətsizlik etdiyini” iddia etmiş, Zelenski isə üzr istəməli olduğu bir səbəbin olmadığını bildirmişdi.
Sonrakı günlərdə Tramp Konqresdə çıxışı zamanı Ukrayna Prezidentinin ona məktub göndərdiyini, bu məktubda Kiyevin nadir torpaq elementləri ilə bağlı sazişi imzalamağa və sülh danışıqlarına açıq olduğunu bəyan etdiyini qeyd edib.
Digər tərəfdən, ABŞ Mərkəzi Kəşfiyyat İdarəsinin (CIA) direktoru Con Ratkliff də Tramp və Zelenski arasında baş verən mübahisədən sonra Ukraynaya kəşfiyyat və hərbi yardımların müvəqqəti dayandırıldığını təsdiqləyib, lakin bu qərarın keçici olduğunu vurğulayıb.
ABŞ-ın Ukraynaya dəstəyini bərpa etməsi, Vaşinqton və Kiyev arasındakı diplomatik gərginliklərin arxada qaldığını və iki ölkə arasında strateji tərəfdaşlığın yenidən gücləndiyini göstərir. Bu addım, həm də Ukraynanın sülh danışıqlarına və beynəlxalq əməkdaşlığa açıq olduğunu təsdiqləyərək, ABŞ-Ukrayna münasibətlərinin gələcəkdə daha sabit bir çərçivədə davam edəcəyini ehtimal etməyə əsas verir.
Fatimə Abbasova
14:34 13.03.2025
Oxunuş sayı: 421
