PKK tamamilə tərk-silah olacaq? - RƏY
Bir neçə gün öncə Türkiyənin ədliyyə nazirinin açıqlamasına görə, ölkə terror təhlükəsindən xilas olmağın astanasındadır və artıq terrorsuz bir Türkiyəyə doğru irəliləyir. Lakin PKK-nın həqiqətən silahı yerə qoyub-qoymayacağı sual altındadır. Bunun reallaşması təkcə hərbi əməliyyatlarla deyil, eyni zamanda siyasi və diplomatik proseslərlə də bağlıdır. Regional güclərin mövqeyi və beynəlxalq amillər də bu məsələdə həlledici rol oynaya bilər. Doğurdanmı PKK təmamilə tərk-silah olacaq?
Mövzu ilə bağlı politoloq Oqtay Qasımov Crossmedia.az-a açıqlama verib: "Terrorist başı Abdullah Öcalanın PKK-nın silah buraxması ilə bağlı etdiyi müraciət tarixi bir hadisədir. Belə ki, 45 ildən artıqdır Türkiyəyə qarşı terror fəaliyyəti ilə məşğul olan və Türkiyədə on minlərlə insanın həyatına son qoyan bir terror təşkilatı silah buraxdığını elan edir. Nəzərə alsaq ki, PKK-nın yaranmasından 45 ildən artıq vaxt keçir, bu terror təşkilatının ayaqda durmasından maraqlı olan çox böyük güc mərkəzləri var və onlar PKK-dan öz məqsədləri üçün istifadə etməyə çalışırlar. O baxımdan yaxın zamanlarda terrorun tamamən bitəcəyini söyləmək məncə tezdir. Təbii ki, Türkiyənin ədliyyə naziri prosesin əsas aparıcı şəxslərindən biri kimi daha yaxşı məlumatlara malikdir. Amma ümumən götürsək qeyd edə bilərik ki, PKK-nın tərkibində olan bəzi qruplar bu qərarla razılaşmayacaq. Belə ki, bu qərardan sonra PKK-nın Suriya qolu olan PYD və YPG bu qərarın onlara aidiyyatı olmadığını söyləmişdilər. Amma ümid edək ki, Türkiyə ədliyyə nazirinin dediyi kimi olsun və on minlərlə insanın həyatına səbəb olan terror təmamilə bitsin".
Ayhan Ağarzayev
10:23 13.03.2025
Oxunuş sayı: 13123
