İran prezidentindən Trampın təhdidlərinə sərt CAVAB
İran prezidenti Məsud Pezeşkian ABŞ prezidenti Donald Trampın İrana qarşı təhdidlərinə sərt reaksiya verib və danışıqlara getməyəcəyini bildirib.
Crossmedia.az xarici mediaya istinadən xəbər verir ki, Tehranda keçirilən tədbirdə çıxış edən Pezeşkian Trampın İranı həm təhdid edib, həm də dialoqa çağırmasını tənqid edərək, “Məni hədələdiyiniz üçün sizinlə danışıqlar aparmayacağam. Nə istəyirsinizsə edin” ifadəsini işlədib.
O, eyni zamanda Trampın Ukrayna prezidenti Volodimir Zelenskiyə münasibətini də sərt tənqid edib və ABŞ rəhbərliyinin siyasətini qərəzli adlandırıb.
ABŞ prezidenti Tramp martın 7-də İranın ali dini lideri Əli Xamneyiyə məktub göndərdiyini açıqlayıb. Tramp məktubda Tehranı danışıqlara çağıraraq, “Ümid edirəm ki, siz danışıqlar aparacaqsınız, çünki hərbi yolla müdaxilə etməli olsaq, bu, dəhşətli bir şey olacaq” deyə qeyd edib. Lakin İranın BMT-dəki Daimi Nümayəndəliyi bu məktubun alındığını təkzib edərək, “İndiyə qədər belə bir məktub almamışıq” açıqlamasını yayıb. Daha sonra ABŞ rəsmiləri yerli mediaya verdiyi açıqlamada Trampın məktubu yazdığını, lakin hələ göndərmədiyini bildiriblər.
İranın ali dini lideri Əli Xamneyi isə ABŞ-ni “etibarsız” adlandıraraq, Pezeşkian və xarici işlər naziri Abbas Erakçinin Vaşinqtonla danışıqlara getməsinə qadağa qoyub.
O, İranın təzyiq və təhdidlər altında ABŞ-lə heç bir formada dialoqa girməyəcəyini vurğulayıb.
Aybəniz Səfərova
00:35 12.03.2025
Oxunuş sayı: 1483
