Nepalda 10 minə yaxın nümayişçi monarxiyanın bərpasını tələb edib
Nepalın paytaxtı Katmanduda 10 minə yaxın monarxiya tərəfdarı ölkənin keçmiş kralı Gyanendra Bir Bikram Şah Devin yenidən taxta çıxması tələbi ilə nümayiş keçirib.
Crossmedia.az xarici KİV-ə istinadən xəbər verir ki, keçmiş kral Gyanendra ölkənin qərb bölgəsinə səfərindən sonra Tribhuvan Beynəlxalq Hava Limanına enib. Onu qarşılamaq üçün toplaşan minlərlə tərəfdar hava limanının əsas girişini bağlayaraq monarxiyanın bərpası üçün etiraz edib.
Nümayişçilər “Kral sarayını krala buraxın”, “Kral qayıdın, ölkəni xilas edin”, “Yaşasın sevimli kralımız” və “Biz monarxiya istəyirik” kimi şüarlar səsləndirib. Polis etirazçılara müdaxilə edərək onların zorakı aksiyaya çevrilməsinin qarşısını alıb. Həmçinin bəzi nümayişçilər hinduizmin yenidən ölkənin rəsmi dini kimi tanınmasını tələb edib.
Xatırladaq ki, 2008-ci ildə kral Gyanendra demokratiya tərəfdarı etirazlar nəticəsində taxtdan endirilib və Nepal 239 illik monarxiya rejiminə son qoyaraq respublika idarəetməsinə keçib.
Lakin son illərdə ölkədəki siyasi qeyri-sabitlik, iqtisadi problemlər və korrupsiya səbəbindən bir çox vətəndaş respublika rejiminə qarşı narazılığını ifadə edir və monarxiyanın bərpasını tələb edir.
22:11 09.03.2025
Oxunuş sayı: 7538
