8 Mart münasibətilə qadınlar etiraz aksiyası keçiriblər
İspaniyada və Türkiyədə qadınlar patriarxiyaya, gender bərabərsizliyinə və qadınlara qarşı zorakılığa etiraz etmək üçün bir araya gəliblər.
Crossmedia.az xarici mediaya istinadən bildirir ki, 8 Martda on minlərlə insan İspaniyanın paytaxtı Madrid şəhərinin küçələrində qadınların hüquqlarını müdafiə etmək və anti-irqçi, feminist gündəmi dəstəkləmək üçün toplaşıb.
Feminist şəbəkəsi olan 8M Komissiyasının təşkil etdiyi tədbirdə iştirakçılar yağışa baxmayaraq yürüş edərək gender bərabərsizliyinə və irqçiliyə qarşı şüarlar səsləndiriblər. İspaniya hökuməti yürüşdə 25.000 insanın iştirak etdiyini bildirsə də, təşkilatçılar bu rəqəmin 80.000-ə yaxın olduğunu iddia edib.
Türkiyədə də qadınlar patriarxiyaya qarşı aksiya keçirib. İstanbulda minlərlə insan gender zorakılığına və cəmiyyətdə qadınlara yönələn təzyiqlərin artmasına etiraz olaraq küçələrə axışıb. Kadıköy rayonunda keçirilən mitinqdə çıxışlar edilib, musiqi və rəqs şouları təşkil olunub.
Bunun ardınca, axşam saatlarında qadınlar İstiqlal prospektində feminist gecə yürüşü üçün toplaşıblar. Lakin həm Kadıköydə, həm də İstiqlalda çevik polis qüvvələrinin təzyiqli su ilə müdaxiləsi diqqəti cəlb edib.
Türkiyə hökuməti 2025-ci ili “Ailə ili” elan edib. Bu qərar bir çox etirazçı tərəfindən qadınları ənənəvi evlilik və analıq rolları ilə məhdudlaşdırmaq cəhdi kimi qiymətləndirilib və tənqid edilib. Hökumətin qadınları məişət zorakılığından qorumaq üçün nəzərdə tutulmuş İstanbul Konvensiyasından 2021-ci ildə çıxmaq qərarı da feministlərin narazılığına səbəb olub.
Zəhra Ağayeva
18:37 09.03.2025
Oxunuş sayı: 7566
