Avropa ABŞ kəşfiyyatının dayandırılmasından sonra Ukraynaya yardım üçün hərəkətə keçir
Avropa ABŞ kəşfiyyatının dayandırılmasından sonra Ukraynaya yardım üçün hərəkətə keçir
Crossmedia.az xəbər verir ki, bu barədə “Politico” nəşri yazıb.
Qeyd olunub ki, Ukraynanın Avropadakı müttəfiqləri ABŞ-dəki Donald Tramp administrasiyasının Kiyevlə kəşfiyyat məlumatlarının paylaşılmasını dayandırmaq qərarından sonra yaranan boşluğu doldurmaq üçün səylərini artırıb. Lakin bu, asan olmayacaq.
ABŞ üçillik müharibə ərzində Kiyevə siqnal kəşfiyyatı, peyk görüntüləri və Rusiya mövqelərinə zərbə endirmək üçün istifadə olunan hədəf koordinatları daxil olmaqla genişmiqyaslı məlumat dəstəyi verib. İndi bu yük, çox güman ki, NATO daxilində kəşfiyyat sahəsində önəmli mövqe tutan Britaniya, Fransa və qismən də Almaniyanın üzərinə düşəcək. Lakin onların ABŞ-ın geniş və irimiqyaslı kəşfiyyat sistemini tam şəkildə əvəz etməsi mümkün görünmür.
“Mən əmin deyiləm ki, Avropa ölkələri bu boşluğu, həqiqətən də, doldura biləcək,” – deyə müttəfiqlərin imkanları ilə tanış olan və Avropanın təhlükəsizlik düzəni barədə açıq danışmaq üçün anonimlik şərti ilə danışan Avropalı rəsmilərdən biri bildirib.
18 agentliyi əhatə edən ABŞ kəşfiyyat sistemi Avropadakı analoji qurumları, xüsusilə də peyk texnologiyaları və analitik imkanlar baxımından, xeyli üstələyir.
“Burada əsas məsələ miqyasdır,” – deyə Barak Obama administrasiyası dövründə Avropa və NATO üzrə müdafiə nazirinin müavini olmuş Cim Taunsend bildirib.
Qeyd olunub ki, kəşfiyyat məlumatlarının paylaşılmasının dayandırılması Avropada Rusiyanın qarşısını almaq məsələsində yaranan narahatlıqları daha da artırıb. Çünki Tramp administrasiyası Moskvaya qarşı getdikcə daha güzəştli mövqe sərgiləyir və eyni zamanda Kiyevə qarşı aqressiv siyasət yeridərək ona silah tədarükünü də dayandırıb.
Nabat Fərzəliyeva
16:15 09.03.2025
Oxunuş sayı: 1291
