Sergey Kopırkin: "Ermənistan və Rusiya arasındakı hərbi əməkdaşlıq davam edəcək"
Ermənistan Rusiyanın 102-ci hərbi bazasının və sərhəd qoşunlarının ölkədəki mövcudluğunu müsbət qiymətləndirir. Bu mövcudluq Ermənistanın təhlükəsizliyini təmin edir və regiondakı sabitliyi qorumağa kömək edir. Rusiyanın Ermənistandakı səfiri Sergey Kopırkinin sözlərinə görə, Ermənistanın Qərb dövlətlərindən aldığı təhlükəsizlik zəmanətləri Rusiya ilə olan əlaqələri ilə müqayisədə çox zəifdir.
Kopırkinin fikrincə, Rusiya-Ermənistan hərbi əməkdaşlığı xüsusən də hərbi-siyasi ittifaq hələ də davam edir. "Bizim bazamız hələ də buradadır, sərhəd qoşunlarımızın mövcudluğu da prinsip etibarilə dəyişməyib və Ermənistan rəhbərliyi bunu müsbət qiymətləndirir", - deyə Rusiya diplomatı bildirib.
ATƏT-in Minsk Qrupunun Dağlıq Qarabağ münaqişəsini həll etmək üçün göstərdiyi səylər faktiki olaraq nəticəsiz qalıb. Qərb həmsədrlərinin Rusiyaya qarşı mövqeyi bu prosesin gələcəyinə ciddi təsir edir. Kopırkin Minsk Qrupunun gələcək fəaliyyəti ilə bağlı narahatlığını ifadə edərək "ATƏT-in Minsk Qrupu işləməsi üçün bütün tərəflərin razılığı olmalıdır. Bu barədə birbaşa müvafiq ölkələr razılaşmalıdır" deyib.
Rusiya Ermənistanın geosiyasi seçimlərini də vurğulayıb. "Ermənistan eyni anda Avrasiya İqtisadi Birliyinin və Avropa İttifaqının üzvü ola bilməz, ölkə seçim etməlidir. Bu, obyektiv reallıqdır", - deyə Kopırkin əlavə edib.
Nigar Yahyazadə
12:00 06.03.2025
Oxunuş sayı: 7254
