Rusiya Suriyaya pulla dolu təyyarə göndərdi
Reuters agentliyinin məlumatına görə, Dəməşq hava limanına Rusiya tərəfindən çap edilmiş və devrilmiş diktator Bəşər Əsədin hakimiyyəti dövrünə aid olan yüz milyardlarla Suriya funtu gətirilib. Bu məbləğ on milyonlarla ABŞ dollarına ekvivalentdir. Agentliyin mənbəsinə əsasən, Rusiya bu pulları Suriyaya dekabrın əvvəlində Əsədin üsyançılar tərəfindən devrilməsindən əvvəl çatdırmağa macal tapmayıb.
Bildirilib ki, Suriyanın yeni hakimiyyəti Əsədin Moskvaya qaçmasından sonra Rusiyadan valyuta emissiyasını dayandırmağı tələb edib. Reuters-in mənbəsi Rusiyanın çap olunmuş nağd pulları Suriyaya göndərməsinin səbəbini dəqiq açıqlamayıb. Hakimiyyət dəyişikliyindən sonra ölkə likvidlik çatışmazlığı ilə üzləşib və yanvar ayında Suriyanın Mərkəzi Bankının yeni rəhbəri Maysa Səbrin inflyasiyanın sürətlə artmasının qarşısını almaq üçün Suriya funtlarının çapını dayandırmaq istədiyini bildirib.
İsrail mediasının yazdığına görə, Putin və Əhməd əl-Şaraa arasında telefon danışığından dərhal sonra Rusiyadan Dəməşqə yüz milyardlarla Suriya funtu gətirən təyyarə enib. Suriyanın Mərkəzi Bankının informasiya ofisi də bu faktı təsdiqləyərək bildirib: "Biz Rusiyadan Suriyaya Dəməşq beynəlxalq hava limanı vasitəsilə Suriya lirəsində vəsaitin daxil olduğunu təsdiq edirik".
07:35 06.03.2025
Oxunuş sayı: 8940
