İsrailin planı: "Qəzzaya yardım dayandı, hücumlar istənilən an başlaya bilər!"
İsrailin xarici işlər naziri Gideon Saar Suriyada yeni qurulan Dəməşq administrasiyasını hədəfə alaraq sərt açıqlamalar verib.
Crossmedia.az xarici KİV-ə istinadən xəbər verir ki, o, Qəzzaya humanitar yardımın dayandırıldığını bəyan edərək, bunun israilli məhbusların azad edilməsi ilə bağlı ilkin razılaşmanın başa çatması ilə əlaqəli olduğunu bildirib.
Saar beynəlxalq media mənsublarının iştirakı ilə keçirdiyi mətbuat konfransında İsrailin humanitar yardım öhdəliklərinə əməl etdiyini, lakin artıq prosesin ilk mərhələsinin sona çatdığını vurğulayıb:
"İsrail humanitar yardımın çatdırılması da daxil olmaqla, bütün öhdəliklərini yerinə yetirdi. Lakin indi Qəzzaya yardımı davam etdirmək üçün heç bir səbəb yoxdur."
O, Qəzzaya edilən hücumların istənilən an bərpa edilə biləcəyini də açıq şəkildə ifadə edib:
"İstədiyimiz zaman edəcəyik."
Eyni zamanda, Saar ABŞ prezidenti Donald Trampın Yaxın Şərq üzrə xüsusi nümayəndəsi Stiv Vitkoffun planını dəstəklədiklərini və Vaşinqtonun bu məsələdə əsas söz sahibi olduğunu vurğulayıb. Tramp administrasiyasının fələstinliləri Qəzzadan digər ölkələrə köçürmək planına dair suallara isə Saar bu mövzuda ABŞ-la sıx əməkdaşlıq etdiklərini bildirərək, açıq dəstəyini nümayiş etdirib.
Bu açıqlamalar İsrailin bölgədəki gərginliyi daha da artıracağına dair narahatlıqları artırıb. Qəzzaya humanitar yardımların dayandırılması isə beynəlxalq təşkilatlar və insan haqları qrupları tərəfindən sərt şəkildə tənqid edilir.
21:49 04.03.2025
Oxunuş sayı: 617
