Zelenski: “ Trampın rəhbərliyi altında işləməyə hazırıq”
Ukrayna prezidenti Volodimir Zelenski ölkəsinin mümkün qədər tez danışıqlar masasına oturmağa hazır olduğunu bəyan edib.
Crossmedia.az xarici KİV-ə istinadən xəbərverir ki, o, ABŞ prezidenti Donald Trampla müharibənin dayandırılması üçün əməkdaşlıq etməyə açıq olduğunu bildirib.
Zelenski sosial media hesabında yayımladığı bəyanatında Ukraynanın sülhə sadiqliyini bir daha vurğulayıb:
"Trampın güclü rəhbərliyi altında sülh üçün işləməyə hazıram. Heç birimiz sonsuz müharibə istəmirik. Ukrayna davamlı sülh üçün mümkün qədər tez danışıqlar masasına oturmağa hazırdır. Heç kim ukraynalılardan çox sülh istəmir. Mən və komandam prezident Trampın güclü rəhbərliyi altında davamlı sülh üçün işləməyə hazırıq”, – deyə Ukrayna lideri bildirib.
İlk addımlar: Atəşkəs və hərbi əsirlərin mübadiləsi
Zelenski müharibənin başa çatması üçün konkret addımların atılmalı olduğunu qeyd edib. O, birinci mərhələdə hərbi əsirlərin azad edilməsini, hava hücumlarına son qoyulmasını və enerji infrastrukturuna hücumların dayandırılmasını vacib hesab etdiyini vurğulayıb. Rusiya bu şərtlərə əməl edərsə, dənizdə atəşkəs elan etməyə hazır olduqlarını bildirib.
“ABŞ ilə sıx əməkdaşlıq etməyə hazırıq”
Zelenski Ukraynanın ABŞ-la daha güclü tərəfdaşlıq qurmaq niyyətində olduğunu qeyd edərək, Trampın prezidentliyi dövründə Ukraynaya Javelin tank əleyhinə raketlərinin verilməsinin vəziyyəti dəyişdirdiyini xatırladıb:
"Biz ABŞ-ın Ukraynanın suverenliyini qorumaq üçün etdiklərini yüksək qiymətləndiririk. Prezident Trampın Ukraynaya Javelinlər verdiyi zaman vəziyyətin necə dəyişdiyini xatırlayırıq. Buna görə minnətdarıq”, – deyə Zelenski vurğulayıb.
Trampla görüş gözləntiləri qarşılamadı
Ukrayna lideri fevralın 28-də ABŞ-da Donald Trampla planlaşdırılan görüşün gözlənildiyi kimi keçmədiyini bildirib:
"Təəssüf ki, belə oldu. İndi hər şeyi qaydaya salmağın vaxtıdır. Biz gələcək əməkdaşlıq və kommunikasiyanın konstruktiv olmasını istəyirik”, – deyə Zelenski əlavə edib.
O, Ukraynanın təhlükəsizlik və strateji əməkdaşlıq sazişini imzalamağa hər zaman hazır olduğunu, bunun ölkəsi üçün mühüm zəmanət olacağını bildirib.
Aybəniz Səfərova
21:35 04.03.2025
Oxunuş sayı: 845
