Türkiyə Prezidenti: İslam dövlətlərinin BMT TŞ-də veto hüququ olmalıdır
Qlobal qərar qəbuletmə mexanizmlərinin dəyişən dünya şərtlərinə uyğunlaşdırılmasının vaxtı gəlib çatıb. Bunu Türkiyə Prezident Rəcəb Rayyib Ərdoğan Ankarada diplomatların iştirakı ilə verilən iftar tədbirində söyləyib.
Türkiyə liderinin sözlərinə görə, koronavirus pandemiyası dünyada ziddiyyət və böhranları gücləndirərək bir çox dövlətlərdə iqtisadi vəziyyəti pisləşdirib.
“Qlobal böhranın nəticələri bu günə kimi hiss olunur. Bu, özünü siyasi qeyri-sabitlikdə, sosial həmrəyliyin pozulmasında, cəmiyyətin radikallaşmasında, sağçıların və millətçi partiyaların mövqelərinin möhkəmləndirilməsində özünü büruzə verir”, - deyə dövlət rəhbəri vurğulayıb.
Ərdoğan qeyd edib ki, dünya ictimaiyyəti “daha ədalətsiz və sərt reallığa doğru sürüklənir”. “İslamofobiya, miqrantlara nifrət, ticarət müharibələri və münaqişələr” ümumi qəbul edilmiş hüquq sistemini məhv edir və ona olan etimadı azaldır”, - deyə siyasətçi bildirib. O qeyd edib ki, "güclünün hüququ" qanun üzərində üstünlüyü ələ alır, zəiflər və haqları tapdananlar isə qlobal səhnədə addım-addım dəstəkdən məhrum olurlar.
Prezident Ərdoğan xəbərdarlıq edib ki, dünya münasibətləri sistemində problemlər davam edərsə, yeni hərbi və siyasi böhranlar qaçılmaz olacaq.
Siyasətçi BMT Təhlükəsizlik Şurasının daimi üzvləri sırasına İslam dünyasının nümayəndələrinin daxil edilməsinə çağırıb. "Müsəlmanlar planetin dörddə birini təşkil edirlər, buna görə də ən azı bir İslam dövləti veto hüququna malik olmalıdır. Bu, zəruri bir ehtiyacdır", - deyə Türkiyə Prezidenti vurğulayıb.
Bununla yanaşı, o bildirib ki, "Türkiyəsiz Avropanın təhlükəsizliyi mümkün deyil". (Azərtac)
07:42 04.03.2025
Oxunuş sayı: 1228
