Misir İsrail və HƏMAS-a atəşkəsin uzadılmasını təklif etdi
Misir vasitəçiləri İsrail və HƏMAS arasında Qəzzada atəşkəs razılaşmasının birinci mərhələsinin iki həftəlik uzadılmasını təklif ediblər.
Crossmedia.az xəbər verir ki, Qahirənin planına əsasən, HƏMAS bu iki həftə ərzində iki qrup girovu İsrailə təhvil verməlidir. Hər bir qrupda bir sağ girov və iki nəfərin cəsədi olacaq. Bu təklif son saatlarda irəli sürülüb və vasitəçilər onun HƏMAS tərəfindən qəbul ediləcəyinə ümid edirlər.
İsrail nümayəndə heyəti yaxın saatlarda yenidən Qahirəyə gedərək bu təşəbbüsü müzakirə edəcək.
Qeyd edək ki, bundan əvvəl İsrailin baş naziri Benyamin Netanyahunun ofisi HƏMAS-ın ABŞ-nin təklifini rədd etdiyini açıqlamışdı. Buna cavab olaraq İsrail Qəzzaya humanitar yardımların çatdırılmasını dayandırıb və anklavın sərhəd keçidlərini bağlayıb.
Fidan Xəlilova
22:20 02.03.2025
Oxunuş sayı: 7457
