Ukrayna XİN-dən MAQATE-yə etiraz
Ukrayna Xarici İşlər Nazirliyi (XİN) Beynəlxalq Atom Enerjisi Agentliyinin (MAQATE) rəhbərliyinə etiraz notası göndərib. Buna səbəb agentliyin Zaporojye Atom Elektrik Stansiyasında (ZAES) Ukraynanın icazəsi olmadan və işğal olunmuş ərazilər vasitəsilə rotasiya həyata keçirməsi olub.
Crossmedia.az xəbər verir ki, bu barədə Ukrayna XİN məlumat verib.
Məlumata görə, Kiyev dəfələrlə MAQATE əməkdaşlarının rotasiyası üçün təhlükəsiz və qanuni marşrut təklif edib. Lakin Moskva bu marşrut üzrə təhlükəsizlik təminatlarını verməkdən imtina edib.
Bunun nəticəsində MAQATE əməkdaşları 80 gün ərzində ZAES-də rotasiyasız işləməyə məcbur olublar.
"Ukrayna MAQATE rəhbərliyinə etiraz notası göndərərək ölkəmizin suverenliyinin və ərazi bütövlüyünün pozulmasını qətiyyətlə pisləyib və gələcəkdə bu cür halların təkrarlanmaması üçün xəbərdarlıq edib. Bundan əlavə, rəsmi Kiyev Rusiyanın MAQATE üzərində misli görünməmiş təzyiqləri ilə bağlı məsələni təşkilatın İdarə Heyətinin növbəti iclasında qaldıracaq", – deyə qeyd olunub.
Qeyd edək ki, Ukrayna XİN bu addımı məcburi humanitar təxliyə kimi qiymətləndirir.
Fatimə Məmmədova
16:50 02.03.2025
Oxunuş sayı: 8557
