ABŞ "Şimal axını-2"ni yenidən işə salmağı planlaşdırır
ABŞ Prezidenti Donald Trampın komandası ölkəsinin Ukraynadakı müharibənin dayandırılması üçün aparılan danışıqlarda üstünlük əldə etməsi məqsədilə "Şimal axını-2" qaz kəmərini yenidən işə salmağı planlaşdırır.
Crossmedia.az xəbər verir ki, bu barədə Financial Times (FT) nəşri məlumat yayıb.
Məlumata görə, Vaşinqtondakı bəzi rəsmi şəxslər bu təşəbbüsü Moskva ilə münasibətləri bərpa etmək səylərinin bir hissəsi kimi qiymətləndirir. Belə ki, ABŞ üçün strateji aktiv hesab olunan qaz kəməri sülh danışıqlarında təzyiq vasitəsi kimi istifadə oluna bilər.
Ekspertlər hesab edirlər ki, belə bir addım ABŞ-yə Avropanın enerji təchizatına təsir imkanlarını artıracaq. Xüsusilə, Rusiya qazından asılılığını azaldan və genişmiqyaslı işğala görə Moskva ilə əməkdaşlığı məhdudlaşdıran Avropa İttifaqı (Aİ) üçün bu, yeni vəziyyət yarada bilər.
ABŞ-nin keçmiş rəsmisinin sözlərinə görə, bu plan gerçəkləşərsə, ABŞ Avropaya belə bir mesaj verə bilər: "İndi Rusiyaya etibar etmək olar, çünki bu prosesdə ABŞ də iştirak edir".
Lakin bunun üçün ABŞ-nin Rusiyaya qarşı sanksiyaları ləğv etməsi, Almaniyanın isə qaz nəqlinə icazə verməsi tələb olunur.
Hazırda bu planın reallaşma ehtimalı və mümkün nəticələri müzakirə olunur.
Fatimə Məmmədova
13:31 02.03.2025
Oxunuş sayı: 9912
