Müqəddəs ayda fələstinlilər sağ qalmaq üçün mübarizə aparır
Qəzza zolağında İsrailin davam edən hücumları səbəbindən evsiz qalan minlərlə fələstinli Ramazan ayının ilk gecəsini şiddətli yağış və selin təsiri altında çadırlarda keçirib.
Crossmedia.az xarici KİV-ə istinadən xəbər verir ki, humanitar böhran dərinləşir, məcburi köçkünlər isə ekstremal hava şəraitinə qarşı müdafiəsiz qalıb.
Yağış və soyuq hava fələstinliləri çarəsiz qoyub
Qəzzada sığınacaq tapmağa çalışan minlərlə insan üçün Ramazan dövrü daha bir sınağa çevrilib.
Səhər saatlarında çadırlara sızan yağış suları səbəbindən xüsusilə qadınlar və uşaqlar alternativ sığınacaq axtarmağa məcbur olub.
Qəzza Bələdiyyəsinin sözçüsü Məhəmməd Muhenna bildirib ki, bölgədə suyun axıdılması və yolların təmizlənməsi üçün lazımi texnika yoxdur:
"İsrailin humanitar yardım təchizatını qəsdən gecikdirməsi vəziyyəti daha da ağırlaşdırır. Fələstinlilər sərt hava şəraitində sağ qalmağa çalışır, lakin beynəlxalq ictimaiyyətin təcili müdaxiləsi lazımdır"- o, qeyd edib.
İsrail atəşkəs razılaşmasını yerinə yetirmir
Beynəlxalq razılaşmalara baxmayaraq, İsrailin yardım karvanlarının və çadırların Qəzza zolağına girişini əngəllədiyi bildirilir.
Hökumət rəsmilərinin sözlərinə görə, bölgəyə humanitar yardımın çatdırılması üçün beynəlxalq təzyiq artırılmalıdır.
Xatırladaq ki, 2023-cü il oktyabrın 7-dən bu yana İsrailin hücumları nəticəsində Qəzzada 48 388 fələstinli həlak olub, 111 803 nəfər isə yaralanıb.
Minlərlə insan dağıntılar altında qalıb, xəstəxana və təhsil müəssisələri isə bombardman nəticəsində fəaliyyətini dayandırıb.
Fələstinlilər üçün Ramazan ayı ibadət və sülh dövrü olmalı idi, lakin İsrailin hücumları və təbii fəlakətlərin təsiri altında bu müqəddəs ay sağ qalmaq uğrunda mübarizəyə çevrilib.
Aybəniz Səfərova
20:20 01.03.2025
Oxunuş sayı: 15595
