Tramp Zelenskini təhqir etdi: "Qalib gələ bilməyəcəksən!"
ABŞ prezidenti Donald Tramp və Ukrayna prezidenti Vlodimir Zelenski Ağ Evdə kritik bir görüş keçirib.
Crossmedia.az xarici mediaya istinadən xəbər verir ki, Tramp, görüş zamanı tərəflər arasında mədən sahəsində mühüm sazişin imzalanacağını bildirib:
"Bu gün mədən müqaviləsini imzalayacağıq. Bizim Ukrayna ilə çox ədalətli razılaşmamız var. Bu müqavilə ABŞ-nin böyük öhdəliyidir", – deyə Tramp qeyd edib.
Tramp həmçinin mədən müqaviləsi çərçivəsində nadir mineralların istifadəsini vurğulayıb və bunların süni intellekt və silah texnologiyalarında tətbiq ediləcəyini bildirib.
ABŞ prezidenti, Ukraynanın müharibəyə qayıtmayacağını və tərəflər arasında sülh sazişinin yaxın olduğunu, atəşkəsin qaçılmaz olduğunu ifadə edib.
Eyni zamanda, o, Ukraynaya silah göndərməyə davam edəcəklərini əlavə edib.
"Zelenski də güzəştə getməli olacaq", – deyə Tramp vurğulayıb.
Görüş zamanı Zelenski, Ukraynaya dəstəyin davam edəcəyinə inandığını ifadə edib: "Avropanın nəyə hazır olduğunu bilirəm, amma Trampdan ABŞ-nin nəyə hazır olduğunu soruşmaq istəyirəm. Düşünürəm ki, Tramp Ukraynanı dəstəkləməkdən əl çəkməyəcək", – deyə o qeyd edib.
Zelenski, Trampa əsirlikdən qayıdan ukraynalı əsgərlərin fotolarını da göstərib.
Görüşün sonunda gərginlik artıb, Tramp Zelenskiyə "Ölkəmizə hörmətsizlik edirsən. Mən bilirəm ki, qalib gələ bilməyəcəksən" deyə cavab verib.
Görüşün nəticələri, ABŞ və Ukrayna arasındakı əlaqələrin gələcəyini müəyyənləşdirəcək və regiondakı siyasi gərginlikləri daha da artıracaq.
Aybəniz Səfərova
23:11 28.02.2025
Oxunuş sayı: 10064
