Xocalı soyqırımının qurbanları Parisdə yad edilib
Azərbaycanın Fransadakı səfirliyinin nəzdindəki Mədəniyyət Mərkəzində Xocalı soyqırımının 33-cü ildönümünə həsr edilən anım tədbiri təşkil edilib.
Crossmedia.az xəbər verir ki, tanınmış rəssam Rövşən Nurun Xocalı soyqırımına həsr edilmiş əsərlərinin sərgiləndiyi tədbirdə Fransadakı diplomatik nümayəndəliklərin üzvləri, diaspor fəalları, yerli ictimaiyyətin təmsilçiləri iştirak ediblər.
Azərbaycanın Fransadakı səfiri Leyla Abdullayeva Xocalı soyqırımı barədə tədbir iştirakçılarına məlumat verib, bu qətliamın Ermənistan silahlı qüvvələri tərəfindən törədilən insanlıq əleyhinə cinayət aktı və soyqırımı olduğunu, cinayəti törədənlərin hüquq qarşısında cavab verəcəklərini vurğulayıb.
“Bu gün Xocalı şəhəri azaddır, Ali Baş Komandan İlham Əliyevin rəhbərliyi ilə Silahlı Qüvvələrimiz Azərbaycanın ərazi bütövlüyünü tam təmin edib. Xocalı sakinlərinin öz evlərinə geri qayıtdığının, şəhərin yenidən canlandığının şahidi oluruq. Eyni zamanda, Xocalı qətliamının yaddaşlarda qalması çox vacibdir, bu bizim borcumuzdur. Bu dəhşətli cinayəti yalnız Azərbaycan deyil, beynəlxalq ictimaiyyət unutmamalıdır ki, gələcəkdə bu kimi hallar təkrarlanmasın”, - deyə L.Abdullayeva bildirib.
Səfir Xocalı soyqırımını törədənlərin ədalət məhkəməsi qarşısına çıxarılmaları üçün dövlətimizin beynəlxalq hüquq çərçivəsində atdığı addımların nəticə verəcəyinə əminliyini ifadə edib.
Tədbirdə Xocalı soyqırımının şahidi, o qanlı gecəni 14 yaşlı gənc kimi xatırlayan, hazırda Fransada yaşayan Şahsuvar Mirzayev çıxış edib. Dəhşətli gecədə yaşananları, öz gözləri ilə gördüklərini tədbir iştirakçıları ilə bölüşən Ş.Mirzayevin şahidlik ifadəsi iştirakçıları təsirləndirib. Öz növbəsində rəssam Rövşən Nur Azərbaycan xalqının qan yaddaşına daxil olan Xocalı soyqırımına həsr etdiyi bir çox əsərin ilk dəfə olaraq Parisdə sərgiləndiyini vurğulayıb. O, Azərbaycan haqqında həqiqətləri rəssam boyası ilə dünyanın müxtəlif ölkələrində təqdim etməyi özünə borc bildiyini qeyd edib.
Tədbir çərçivəsində Fransada təhsil alan azərbaycanlı musiqiçi Ağarəhim Quliyev Xocalı qurbanlarının əziz xatirəsi üçün milli musiqimizi ifa edib.
21:46 26.02.2025
Oxunuş sayı: 680
