Fransa ilə Azərbaycan arasında "soyuq müharibə": "Regionumuzda militarizasiya siyasəti..."
Fransanın Ermənistandakı səfiri Olivye Dekotinyin bu günlərdə Ermənistanın “İctimai radiosuna” müsahibəsində Yelisey Sarayının Cənubi və Azərbaycanla bağlı riyakar mövqeyini növbəti dəfə ortaya qoyub. O, növbəti dəfə rəsmi Bakı ilə bağlı əsassız ittihamlar səsləndirib.
Azərbaycan Xarici İşlər Nazirliyi fransız diplomatın fikirlərinə münasibət bildirib. Bəyanatda qeyd olunub ki, Dekotinyinin növbəti dəfə Azərbaycan ərazilərinin işğalına və separatçılığa son qoyan Azərbaycanın legitim tədbirlərini sual altına alması ilk növbədə Fransa tərəfinin reallıqları necə təhrif etdiyini, bölgədə dayanıqlı və həqiqi sülh quruculuğunda maraqlı olmadığını bir daha nümayiş etdirir.
Ümumiyyətlə, rəsmi Paris zaman- zaman Azərbaycanla bağlı qeyri- adekvat mövqe ortaya qoyur. Xüsusilə, mövcud Emmanuel Makron hökumətinin Azərbaycana qarşı qərəzi, fitnə - fəsadı bitib- tükənmkə bilmir.
Bu barədə Crossmedia.az-a danışan Milli Məclisin deputatı Pərvanə Vəliyevanın fikrincə, səfirin Azərbaycan ərazilərinin işğalına və separatçılığa son qoyan Azərbaycanın legitim tədbirlərini yenidən sorğulaması, onun bölgədə dayanıqlı və həqiqi sülh qurmağa maraqlı olmadığını ortaya qoyur: "Fransanın Ermənistandakı səfiri mütəmadi olaraq Ermənistan-Azərbaycan şərti sərhədinə gələrək ölkəmiz əleyhinə ifadələr işlədir, verdiyi açıqlamalarda Azərbaycanın ərazi bütövlüyünü və suverenliyini sual altına qoyur. Fransa həm ikitərəfli, həm də çoxtərəfli əlaqələrdə Azərbaycana qarşı aqressiv siyasət həyata keçirir. Belə ki, Fransa mediasında Azərbaycan əleyhinə kampaniya geniş vüsət alıb. Fasiləsiz anti-Azərbaycan verilişləri yayımlanır və məqalələr dərc edilir. Azərbaycanın guya Fransada qeyri-sabitlik yaratmaq istiqamətində addımlar atdığına dair məlumatlar tirajlanır. Fransa Prezidenti, habelə Fransa Hökumətinin yüksək vəzifəli nümayəndələri (nazirlər), Parlament üzvləri, yerli icra hakimiyyətlərinin rəhbərləri və digərləri Azərbaycan əleyhinə həm beynəlxalq, həm də daxili platformalarda saysız-hesabsız ittihamlar səsləndirirlər. Fransa Senatı və Milli Assambleyasında ümumilikdə 6 anti-Azərbaycan qətnaməsi qəbul olunub. Vətən müharibəsindən sonra Avropa Parlamentində xüsusilə Fransalı deputatların, habelə onların daha çox üzv olduğu “Renew” qrupunun təşəbbüsü ilə 10 anti-Azərbaycan qətnaməsi qəbul olunub".
Parlamentarinin fikrincə, 44 günlük Vətən müharibəsindən sonra qarşı tərəfin əsassız ittihamları və düşmənçiliyi səbəbindən Azərbaycan və Fransa arasında münasibətlər kəskin şəkildə pisləşib: "Bu böhranın təşəbbüskarı Azərbaycan deyil, Fransa hökumətidir. Fransanın Azərbaycana əsassız hücumları ikitərəfli münasibətləri böhran səviyyəsinə çatdırıb. Fransanın haqsız addımlarını Azərbaycana qarşı “soyuq müharibə” kimi qiymətləndirmək olar. Fransa regionumuzda militarizasiya siyasəti həyata a keçirir, Ermənistanı müasir hücum təyinatlı silahlarla təmin edir, üzv olduğu bütün beynəlxalq təşkilatlarda anti-Azərbaycan gündəliyi və qətnamə layihələri irəli sürür. Azərbaycanın atdığı addımlar isə cavab xarakteri daşıyır və adekvatdır. Regionun sülh danışıqlarına və sabitliyə ziyan vurmaq istəyən ATƏT Minsk qrupunun dəfni çoxdan edilmiş həm-sədrlərindən biri olan Fransa artıq bu 3-lü formatın işə yaramadığını anladığı üçün regionda Ermənistanın əli ilə başqa formatda (Aİ mülki missiyası ilə) qalmaq istəyir və hər vəchlə Ermənistanı revanşizmə qızışdırır. Fransanın regionda gərginliyi artıran bu addımları qəbuledilməzdir".
Kənan Novruzov
16:49 25.02.2025
Oxunuş sayı: 12691
