Azərbaycanla Pakistan bu sahədə əməkdaşlığı gücləndirir
“Bakı Fond Birjası” QSC (BFB) və “Pakistan Fond Birjası” (PSX) ikitərəfli əməkdaşlığın gücləndirilməsinə dair memorandum imzalayıblar.
Crossmedia.az bu barədə BFB-yə istinadən xəbər verir.
Məlumata görə, sənədi BFB-nin İdarə Heyətinin sədri Ruslan Xəlilov və PSX-nin Baş İcraçı Direktoru Farrux Sabzvari imzalayıb. Virtual imzalanma mərasimində iki birjanın nümayəndə heyəti iştirak edərək, hər iki qurum əlaqələrin daha da möhkəmləndirilməsini və həmçinin müvafiq kapital bazarlarının inkişafına töhfə verəcəkəlirini vurğulayıblar.
Memorandumun məqsədi Pakistan və Azərbaycanın kapital bazarlarına dair əməkdaşlıq əlaqələrini gücləndirmək, hər iki ölkənin maliyyə xidmətləri sektorlarında qarşılıqlı inkişafı təşviq etməkdir.
BFB və PSX tərəfdaşlıq çərçivəsində bazar əməliyyatları, onların inkişafı və ən yaxşı tənzimləyici alətlər üzrə təcrübə mübadiləsi aparacaqlar. “Dual listinq”, ortaq məhsulların hazırlanması, bazar əməliyyatları və qaydaları haqqında təcrübələrin mübadiləsi əməkdaşlığın əsas istiqamətlərinə daxildir.
Memorandumun imzalanması ilə başlayan strateji tərəfdaşlığın Azərbaycan və Pakistanın maliyyə sektorunda daha sıx əlaqələrə yol açacağı, hər iki ölkədə ümumi iqtisadi artıma və investisiya mühitinə töhfə verəcəyi gözlənilir.
Memorandum Pakistanın Baş naziri Məhəmməd Şahbaz Şərifin Azərbaycana rəsmi səfəri çərçivəsində imzalanıb.
20:34 24.02.2025
Oxunuş sayı: 920
