Avropa Ukraynaya qoşun göndərir: Bu o deməkdir ki...
Avropa liderləri Ukraynada 25-30 minlik hərbçi yerləşdirməyi müzakirə edirlər. Bu qüvvələr təmas xəttində deyil, müharibənin aktiv fazaya keçməməsi üçün müəyyən bölgələrdə yerləşdiriləcək. Hərbçilər, Rusiya qoşunlarının müharibəni bərpa etməsi halında, güc nümayişi etmək üçün hazırlıqda olacaq bir neçə briqadadan ibarət olacaq. Bu, Rusiya ilə münaqişənin gərginləşməsi vəziyyətində Avropanın hazırlıqlı mövqe tutması üçün nəzərdə tutulur.
Avropanın Ukraynaya qoşun göndərmə ehtimalı o deməkdir ki, onlar müharibənin uzanmasında maraqlıdırlar. Bu isə ABŞ- nin planlarına uyğun deyil. Deməli, Avropanın Ukraynaya qoşun göndərməsu perspektivdə ABŞ-la gərginliyin artmaslna səbəb ola bilər.
Bu barədə Crossmedia.az-a danışan hərbi ekspert Elxan Şıxəliyev bildirib ki, ABŞ ilə Rusiya rəsmiləri arasında Rusiya-Ukrayna müharibəsinin dayandırılması ilə bağlı müzakirələr aparılır: "Bu müzakirələrdə Rusiyanın və Ukraynanın şərtləri və onlar arasında gedəcəyi güzəştlər müəyyənləşdirilir. Eyni zamanda, atəşkəs rejiminə müharibənin aktiv fazadan passiv fazaya keçməsini təmin edəcək güclər yerləşdirilməlidir. Adətən bu, sülhməramlı qüvvələr olur. Rusiya heç bir halda bunu NATO-ya daxil olan ölkələrin silahlı qüvvələri şəklində o bölgəyə yerləşdirilməsinə razı olmayacaq. Buna görə də, düşünürəm ki, BMT çətiri altında sülhməramlı qüvvələrin Ukrayna bölgəsində yerləşdirilməsi olacaq. Bu qüvvələr həm Aİ, həm də NATO-ya daxil olan, eləcə də bu təşkilatlara daxil olmayan ölkələrin silahlı qüvvələrindən ibarət ola bilər".
Ekspertin sözlərinə görə, bu şəxsi heyətin yerləşdirilməsi atəşkəsə keçilməsi ilə paralel olaraq, sülh sazişinin imzalanması zamanı həyata keçirilməlidir: " İndiki mərhələdə müharibənin aktiv fazasında, sülh sazişinin danışıqları bitənə qədər, NATO-ya daxil olan ölkələr bununla bağlı razılıq vermirlər. Bu, ABŞ-nin sülh planının bir hissəsidir. ABŞ bildirir ki, onların orada silahlı qüvvələrinin nümayəndələri olmayacaq. Bu məsələ Aİ-yə təhvil veriləcək. Fransadakı görüşdə isə Aİ-yə daxil olan ölkələrin liderləri bu qüvvələrin hansı tərkibdə olacağını müzakirə edirlər. Lakin bütün bu müzakirələrin sonunda qərarı verən tərəf ABŞ olacaq. Çünki Rusiya ilə razılaşma olarsa, həmin qüvvələrin kimlərdən ibarət olacağı məlum olacaq".
E.Şixaliyev nəticə etibarilə, orada kimlər olursa olsun, əsas məqsəd müharibənin aktiv fazaya keçməməsini təmin edəcək güclərin mövcudluğu olmalı olduğunu qeyd edib: "Yaxud da mümkün ola biləcək insidentlərin araşdırılması üçün bir missiyanın fəaliyyət göstərməsi vacibdir. Gələcəkdə Ukrayna ilə Rusiya arasında müharibənin yenidən aktiv fazaya keçməməsi üçün Ukraynanın təhlükəsizliyinin təminatını verəcək güclərin yerləşdirilməsi lazımdır. Hər halda, bu qüvvələrin oradakı mövcudluğu NATO silahlı qüvvələrinin tərkibində deyil, sülhməramlı qüvvələrin tərkibində olmalıdır və onların əsas məqsədi münaqişənin yeni bir aktiv fazaya keçməsini əngəlləmək olacaq. Lakin bu, bütün müzakirələrin nəticə verməsi üçün ABŞ və Rusiya arasında müharibənin bitməsi ilə bağlı şərtlər barədə razılaşma əldə edilməlidir".
Fatimə Məmmədova
19:15 18.02.2025
Oxunuş sayı: 9964
