Azərbaycan–Fransa münasibətlərində yeni dövr başlayıb - Deputat
Azərbaycanla Fransa arasında münasibətlərdə yeni, daha konstruktiv mərhələ başlayıb. Ölkələr arasında yaranan anlaşılmazlıqlar aradan qaldırılıb və diplomatik əlaqələrin inkişafı üçün əlverişli şərait yaranıb. Prezident İlham Əliyev Fransanın yeni səfiri Sofi Laqutun etimadnaməsini qəbul edərkən vurğulayıb ki, Kopenhagendə Prezident Emmanuel Makronla görüşdən sonra gərginlik yaradan məsələlər artıq keçmişdə qalıb. Yeni dövrdə qarşılıqlı hörmət və əməkdaşlığa əsaslanan münasibətlərin qurulması ön plandadır. Diqqət əsasən işgüzar, mədəni və humanitar sahələrdə əlaqələrin bərpasına yönəlib.
Mövzu ilə bağlı Crossmedia.az-a danışan Milli Məclisin deputatı Vüqar Bayramov bildirib ki, Azərbaycan həm qonşularla, həm də inkişaf etmiş ölkələrlə yaxşı münasibətlərin qurulmasında maraqlıdır. “Son illər Azərbaycan və Fransa arasında münasibətlərin soyuqladığı müşahidə olunurdu. Təəssüf ki, Parisin qərəzli açıqlamaları bu prosesə mənfi təsir göstərmişdi. Amma Azərbaycan eyni zamanda Avropa İttifaqı ilə münasibətlərini daha da gücləndirir. Fransa isə Avropa İttifaqında gücünə görə seçilən ölkələrdəndir və iqtisadi əməkdaşlıq baxımından bizim üçün prioritetdir.Təbii ki, Azərbaycan hər zaman əməkdaşlığı dəstəkləyir. Soyuq münasibətlərin sona çatması və yeni, qarşılıqlı faydalara əsaslanan əlaqələrin qurulması ölkəmizin maraqlarına uyğundur. Vaşinqton Anlaşmasından sonra Fransa ilə əlaqələrin yaxşılaşdırılması istiqamətində addımlar gözlənilən idi və cənab Prezident İlham Əliyevin də vurğuladığı kimi, artıq münasibətlərdə yeni mərhələ başlanıb. Bu mərhələdə tərəflər qarşılıqlı əməkdaşlıq nəticəsində daha çox iqtisadi fayda əldə edə bilərlər və Azərbaycan da milli maraqlarına uyğun olaraq Fransa ilə əməkdaşlığın genişləndirilməsində maraqlıdır”.
Mehriban Yariyeva
11:02 18.10.2025
Oxunuş sayı: 10752
