Fransa reallıqları qəbul edib: Liderlər səviyyəsində gərginliyi aradan qaldırmaq üçün addımlar atılıb
Azərbaycan və Fransa arasında ikitərəfli münasibətlərdə yeni mərhələ başlamaq üzrədir. Prezident İlham Əliyev Fransanın Azərbaycanda yeni təyin olunan səfiri Sofi Laqutun etimadnaməsini qəbul edərkən vurğulayıb ki, keçmişdə anlaşılmazlığa səbəb olan məsələlər artıq arxada qalıb. Dövlət başçısı insanların və biznes nümayəndələrinin qarşılıqlı təmasları, eləcə də mədəni və humanitar əməkdaşlığın bərpası və inkişafının önəmini xüsusi qeyd edib.
İkitərəfli əlaqələrin gələcəyi barədə Crossmedia.az-a danışan Milli Məclisin deputatı, Ana Vətən Partiyasının sədr müavini Günay Ağamalı bildirib ki, Prezident İlham Əliyevin Fransa ilə münasibətlərdə yeni dövrün başlanmasını vurğulaması Azərbaycanın müstəqil, bərabərhüquqlu və qarşılıqlı hörmət prinsiplərinə əsaslanan xarici siyasətinin növbəti mühüm mərhələsidir: "Bu, həm siyasi, həm də diplomatik baxımdan yeni reallıqlara uyğun münasibətlərin formalaşdırılması istiqamətində strateji addımdır. Azərbaycan həmişə Fransa ilə xoş və qarşılıqlı faydalı əməkdaşlıq marağında olub. Lakin ötən illərdə, xüsusilə 44 günlük Vətən Müharibəsindən sonra Paris fəal şəkildə anti-Azərbaycan ritorikası nümayiş etdirib. “Bütün bunlar onların erməni tərəfdarlığından irəli gəlirdi. Lakin Azərbaycan artıq Cənubi Qafqazda yeni geosiyasi reallıqlar yaradıb və qlobal proseslərin fəal iştirakçısıdır. Fransa tərəfi də mövcud reallıqları qəbul edib, liderlər səviyyəsində gərginliyi aradan qaldırmaq üçün addımlar atılıb”.
Deputatın sözlərinə görə, Azərbaycan artıq qalib dövlət kimi regional və qlobal miqyasda söz sahibidir və Parislə münasibətlərin gələcəyi qarşılıqlı hörmət, bərabər tərəfdaşlıq və milli maraqların qorunması prinsipləri üzərində qurulmalıdır: “Prezident İlham Əliyevin rəhbərliyi ilə Azərbaycan regionda sülhün və əməkdaşlığın təminatçısı kimi çıxış edir. Fransa ilə münasibətlərin yeni mərhələsi də ölkəmizin güclü, müstəqil və etibarlı tərəfdaş kimi beynəlxalq mövqelərinin daha da möhkəmlənməsinə xidmət edəcək”.
Mehriban Yariyeva
11:10 18.10.2025
Oxunuş sayı: 34938
