Makron seçki kampaniyası üçün ABŞ şirkətindən qeyri-qanuni maliyyə vəsaiti alıb
Son illərdə Avropada siyasi şəffaflıq və dövlət idarəçiliyində dürüstlük məsələləri getdikcə daha çox problemə çevrilir. Xüsusilə Fransa kimi böyük bir ölkədə siyasi liderlərin korrupsiya iddiaları ilə gündəmə gəlməsi cəmiyyətin hökumətə olan inamını ciddi şəkildə sarsıdır. Prezident Emmanuel Makronun hakimiyyəti dövründə ortaya çıxan korrupsiya və rüşvətxorluq faktları təkcə Fransa daxilində deyil, beynəlxalq aləmdə də geniş müzakirələrə səbəb olub. Makron və komandası ətrafında toplanan korrupsiya iddiaları Fransanın siyasi arenasında güclü silkələnmələrə yol açıb və bu proseslər hələ də davam etməkdədir.
Mövzu ilə bağlı politoloq Əliqismət Bədəlov Crossmedia.az-a açıqlama verib: "Fransa prezidenti Emanuel Makronun 2017-ci il seçki kampaniyası zamanı yol verilmiş saxtakarlıq hallarını xatırlatmaq istərdim. Fransanın aparıcı KİV-ləri seçki kampaniyasının maliyyə saxtakarlığı ilə müşayiət olunduğunu yazmışdı. Hüquq-mühafizə orqanlarının apardığı araşdırmalar nəticəsində məlum olmuşdu ki, Makron seçki kampaniyası üçün ABŞ-nin bir şirkətindən qeyri-qanuni maliyyə vəsaiti alıb. Həmin araşdırmalar zamanı Makronun həmin şirkətlə sıx əlaqələrinin olduğu da ortaya çıxmışdı. Prezident seçildikdən sonra Makron ABŞ-dan olan iş adamları ilə sərfəli dövlət müqavilələri də imzalayıb".
Politoloq Böyük Britaniya mətbuatında dərc olunan sensasiyalı məqalədən danışıb: "Son vaxtlar Fransada rüşvətxorluq və korrupsiya məsələləri geniş rezonans doğurub. Artıq Makronun ətrafında daha bir korrupsiya faktı yayılıb. Bu fakt bir daha sübut etdi ki, demək olar, Makron hakimiyyətinin əsasını korrupsiya təşkil edir. Dünyanın aparıcı KİV-ləri də Makron hökumətinin məsul şəxslərinin korrupsiya bataqlığında boğulduğuna dair məqalələr dərc edib. Bu barədə Böyük Britaniya mətbuatında yayımlanan sensasiyalı məqalə də dünya ictimaiyyətində böyük marağa səbəb olub. Məqalədə qeyd edilir ki, 2018-ci ildə Azərbaycan əsilli rusiyalı milyarder Fərhad Əhmədovun "Rona" adlı yaxtasının beynəlxalq həbsdən azad edilməsi müqabilində ondan 6 milyon ABŞ dollarından çox rüşvət tələb olunub. Həmin rüşvəti Makronun mühafizə xidmətinin rəisi Aleksandr Benalla və onunla əlbir olan mərakeşli Amas Berras istəyib".
Əliqismət Bədəlov yekun olaraq qeyd edib ki: "Fransada etiraz aksiyaları getdikcə genişlənir. Ortaya çıxan bu yeni fakt da həmin aksiyaların daha da güclənməsinə səbəb olacaq".
Ayhan Ağarzayev
12:31 18.02.2025
Oxunuş sayı: 17832
