“Ata, mən bacardım”- İmtahan keçirilən məntəqələrdən REPORTAJ
Bu gün, 16 fevral, Azərbaycanda dövlət qulluğu və magistratura imtahanları keçirilir. İmtahan verən gənclərin əksəriyyəti həyəcanlıdır. Səhər saatlarında Əcəmidən çıxaraq 20 Yanvar metrosu yaxınlığında yerləşən 159 nömrəli məktəbə yollandım. Məktəbə yaxınlaşdıqca imtahana gələn abituriyentlərin toplaşdığını görmək mümkün idi.
Məktəbin qarşısında gənclər müxtəlif hisslər içində idilər. Bu, onların üz ifadələrindən aydın hiss olunurdu. Bəziləri sakit, bəziləri isə olduqca həyəcanlı görünürdü. Onlardan biri, gənc bir qız, göz yaşlarını saxlaya bilmirdi. Yanındakı orta yaşlı kişi ilə dialoqunun şahidi oldum. Dediklərindən məlum olurdu ki, valideynləri işdə olduğuna görə tək gəlməli olunub. O, göz yaşları içində imtahana girməyə hazırlaşırdı. Bu an, oğlunu imtahana gətirmiş bir dayı onun ağladığını görüb yaxınlaşdı.
Dayı mehribanlıqla qıza müraciət etdi:
– Narahat olma, dərin nəfəs al, üç saniyə gözlə və sonra nəfəsini burax. Bunu bir neçə dəfə et, özünü daha yaxşı hiss edəcəksən.
Qız dayının dediklərini etdi. Həqiqətən də, bu texnika ona bir qədər sakitləşməyə kömək etdi. Dayı ona ürək-dirək verərək dedi:
– Həyəcana ehtiyac yoxdur, bu sadəcə bir imtahandır. Keçsən, gözəl nəticə olar, keçməsən də canın sağ olsun. Əsas odur ki, sən çalışmısan.
Lakin qız göz yaşları içində cavab verdi:
– Ailəm mənim qəbul olmağım üçün çox əziyyət çəkib, məni bahalı kurslara göndərib. Mən bu imtahanı mütləq keçməliyəm.
Dayı ona təsəlli verməyə çalışsa da, imtahana giriş saatının bitməsinə az qaldığı üçün qız artıq içəri daxil olmaq üçün irəlilədi.
Bu zaman başqa bir gənc sürətlə qaçaraq imtahana gəlirdi. Saat 10:58 idi və girişə cəmi iki dəqiqə qalmışdı. O, tələsik polis əməkdaşına yaxınlaşdı, lakin telefonunu üzərində saxladığı üçün içəri buraxılmadı. Polis ondan telefonu kiməsə verməsini tələb etdi.
Gənc çarəsiz halda qapıda gözləyən valideynlərdən birinə yaxınlaşdı və yalvarışla dedi:
– Xahiş edirəm, telefonumu saxlayarsınız?
Xanım tərəddüd etmədən razılaşdı:
– Problem yoxdur, saxlayaram.
Gənc dərhal buraxılış vərəqəsini polisə təqdim etdi və son anda içəri keçə bildi. Onun üzündə həm rahatlıq, həm də təşəkkür hissi var idi.
Saat 11:00-da imtahan başladı.
Buradan 54 nömrəli məktəbə yollandım.
...Saat 14:30-da artıq imtahan başa çatmışdı. Tələbələr bir-bir məktəbdən çıxır, dostları və ailə üzvləri ilə təəssüratlarını bölüşürdülər. Çoxları sualların normal səviyyədə olduğunu, amma xüsusilə məntiq tapşırıqlarının bir qədər düşündürücü gəldiyini deyirdi.
İmtahandan çıxan bir gənc atasını görən kimi sevinclə qışqırdı:
– Ata, mən bacardım!
Bu an, imtahan verən hər bir gəncin yaşadığı gərginliyin və zəhmətin nəticəyə çevrildiyi an idi. Kimisi uğur qazanacaq, kimisi növbəti dəfə daha yaxşı hazırlaşacaq, lakin bu gün onların hamısı böyük bir sınaqdan keçdi.
Məhəmməd Vəliyev
15:46 16.02.2025
Oxunuş sayı: 12023
