"Azərbaycanın xarici siyasətində Türk-İslam dünyası ilə əməkdaşlıq xüsusi yer tutur" - RƏY
Azərbaycan dövlət səviyyəsində Türkiyə, Özbəkistan və Pakistanla siyasi, iqtisadi və mədəni əməkdaşlığını dərinləşdirməkdə davam edir. Son illərdə üçtərəfli formatlarda keçirilən görüşlər, iqtisadi layihələr və təhlükəsizlik sahəsində əməkdaşlıq bu istiqamətdə atılan mühüm addımlardır. Bakı bu əlaqələri daha da gücləndirməklə regionda strateji inteqrasiyanı sürətləndirməyi hədəfləyir.
Azərbaycan-Türkiyə-Özbəkistan əməkdaşlığı əsasən enerji, nəqliyyat və ticarət sahələrində inkişaf edir. Türk Dövlətləri Təşkilatı çərçivəsində aparılan müzakirələr iqtisadi və mədəni inteqrasiyanı təşviq edir. Eyni zamanda, Azərbaycan-Türkiyə-Pakistan formatı hərbi və təhlükəsizlik sahəsində əməkdaşlığı gücləndirir. Bu üçlük regional sabitlik və qarşılıqlı maraqların qorunması baxımından vacib hesab olunur.
Azərbaycanın milli maraqlara əsaslanan xarici siyasətində Türk-İslam dünyasına daxil olan ölkələrlə əlaqələrin inkişafı mühüm yer tutur. Bu barədə Milli Məclisin deputatı Tənzilə Rüstəmxanlı Crossmedia.az-a açıqlamasında bildirib.
Onun sözlərinə görə, Prezident İlham Əliyev milli-mənəvi və dini dəyərlərin qorunmasına xüsusi diqqət ayıraraq, daim İslam həmrəyliyinin möhkəmləndirilməsi üçün təşəbbüslərlə çıxış edib. Bu siyasətin əsas istiqamətlərindən biri də Azərbaycanın Türkiyə ilə birgə xarici siyasət kursu yürütməsidir.
"Dünyada Azərbaycan və Türkiyə qədər bir-birinə yaxın olan başqa iki dövlət tapmaq çətindir. Bu əlaqələr zamanın sınağından uğurla çıxıb və heç bir kənar qüvvə onları zəiflədə bilməyib. Ümummilli lider Heydər Əliyevin 'Bir millət, iki dövlət' prinsipi bu münasibətlərin əsasını təşkil edir. Prezident İlham Əliyevin sözləri ilə desək, Türkiyə və Azərbaycan artıq bir yumruq, bir ürək, bir candır". – deyə deputat vurğulayıb.
Tənzilə Rüstəmxanlı Azərbaycan və Pakistan arasındakı əlaqələrin də birgə tarix, mədəniyyət, din və qarşılıqlı dəstəyə əsaslandığını bildirib. Onun sözlərinə görə, bu münasibətlərin inkişafına həm dövlətlər səviyyəsində qətiyyətli siyasi iradə var, həm də hər iki ölkənin cəmiyyətlərində bu əlaqələrin güclənməsinə böyük istək mövcuddur.
"Azərbaycan, Türkiyə və Pakistan beynəlxalq təşkilatlarda da bir-birilərinin təşəbbüslərinə və haqlı mövqelərinə ardıcıl dəstək verirlər. Hər üç ölkə təkcə ikitərəfli deyil, həm də üçtərəfli formatda əməkdaşlığı genişləndirir. Bu əməkdaşlıq təkcə siyasi deyil, həm də hərbi sahəni əhatə edir". - deputat əlavə edib.
Onun sözlərinə görə, Azərbaycanın müdafiə potensialının gücləndirilməsi üçün Pakistan və Türkiyə ilə hərbi sahədə əməkdaşlıq xüsusi əhəmiyyət daşıyır. Hər üç ölkənin hərbi qurumlarının yüksək səviyyəli rəsmiləri mütəmadi olaraq görüşlər keçirir, təcrübə mübadiləsi aparır və birgə istehsalat layihələri üzərində işləyirlər.
Deputat həmçinin Azərbaycan, Türkiyə və Özbəkistan arasındakı əməkdaşlığın da regional və beynəlxalq miqyasda mühüm əhəmiyyət daşıdığını vurğulayıb. O, bu çərçivədə iqtisadiyyat, ticarət, nəqliyyat, kommunikasiya və yaşıl enerji kimi sahələrdə strateji layihələrin həyata keçirildiyini bildirib.
"Xəzər, Qara və Aralıq dənizlərini birləşdirən strateji layihələr, o cümlədən 'Rəqəmsal İpək Yolu' və 'yaşıl enerji ixracı' kimi təşəbbüslər Azərbaycan-Türkiyə-Özbəkistan əməkdaşlığının əhəmiyyətini daha da artırır" – deyə, Tənzilə Rüstəmxanlı qeyd edib.
Onun fikrincə, Ankara Bəyannaməsi üçtərəfli əməkdaşlığın əsaslarını daha da möhkəmləndirib. Burada tərəflərin iqtisadi, hərbi, siyasi və humanitar sahələrdə birgə fəaliyyət istiqamətləri müəyyənləşdirilib. Eyni zamanda, Azərbaycanın Qarabağ və Şərqi Zəngəzur bölgələrində yenidənqurma və minatəmizləmə işlərinə dəstək ifadə olunub.
"Zəngəzur dəhlizinin açılması və Qarabağa verilən dəstək, Türk Dövlətləri Təşkilatı çərçivəsində qəbul edilən qərarların icrası bizim üçün mühüm inkişaf mərhələsidir". – deputat bildirib.
Tənzilə Rüstəmxanlının sözlərinə görə, müasir dünya siyasətində Azərbaycanın həyata keçirdiyi "şəbəkə diplomatiyası" mühüm əhəmiyyət daşıyır.
"Böyük dövlətlər zaman-zaman müxtəlif ölkələrə təzyiq etməyə, 'böyük qardaş' rolunu oynamağa çalışıblar. Belə şəraitdə müstəqil xarici siyasət yürütmək siyasi qətiyyət və incə diplomatiya tələb edir. Azərbaycan bu balansı qoruyub saxlayır və çoxtərəfli əməkdaşlıq formatından istifadə edir". – deputat vurğulayıb.
O, qeyd edib ki, Azərbaycanın təşəbbüsü ilə formalaşan üçtərəfli formatlar regional əməkdaşlığın güclənməsinə və ortaq maraqların qorunmasına imkan yaradır.
"Üçtərəfli formatda əməkdaşlıq həm tərəfdaşlar üçün faydalıdır, həm də geosiyasi sabitliyə töhfə verir. Azərbaycan bu istiqamətdə mühüm addımlar ataraq təkcə siyasi deyil, həm də iqtisadi və hərbi sahədə nüfuzunu artırır" – deyə, Tənzilə Rüstəmxanlı bildirib.
Sonda deputat vurğulayıb ki, Azərbaycanın müstəqil siyasət yürütməsi, regional lider rolunu möhkəmləndirməsi və investisiya mənbəyi kimi cazibədarlığını artırması ölkənin strateji mövqeyini daha da gücləndirir.
Nihat Tahirov
20:04 15.02.2025
Oxunuş sayı: 5788
