Səudiyyə Ərəbistanı mövqeyini dəyişmir: İsraillə hər hansı əlaqə mümkün deyil
Səudiyyə Ərəbistanı müstəqil Fələstin dövləti qurulmadan İsraillə münasibətləri normallaşdırmayacağını bir daha bəyan edib. Bu barədə Krallığın Xarici İşlər Nazirliyi ölkəsinin möhkəm və sarsılmaz mövqeyini bir daha vurğulayaraq bəyan edib.
Bu bəyanat İsrailin Baş naziri Benyamin Netanyahunun fevralın–də Ağ Evdə ABŞ prezidenti Donald Trampla birgə mətbuat konfransı zamanı Ər-Riyadla potensial sülh razılaşması ilə bağlı nikbinliyini ifadə etməsindən sonra verilib. “Məncə, İsrail və Səudiyyə Ərəbistanı arasında sülh təkcə mümkün deyil, həm də bunun baş tutacağını düşünürəm”, - deyən Netanyahu, həm özünün, həm də Trampın buna nail olmaqda qərarlı olduğunu bildirmişdi.
Mətbuat konfransı zamanı Tramp Fələstinlilərin Qəzzadan köçürülməsi təklifini digər Yaxın Şərq liderləri ilə müzakirə etdiyini və onların bu ideyanı dəstəklədiklərini bildirib. "Digər liderlər bu ideyanı sevirlər" deyə o diqqətə çatdırıb.
ABŞ və İsrail rəsmilərindən gələn bu bəyanatlara baxmayaraq, cəmi bir gün əvvəl beş ərəb xarici işlər naziri və Fələstinin yüksək rütbəli rəsmisi ABŞ dövlət katibi Marko Rubioya birgə məktub göndərərək fələstinlilərin Qəzzadan köçürülməsi planlarına qarşı çıxmışdılar.
İordaniya, Misir, Səudiyyə Ərəbistanı, Qətər və BƏƏ xarici işlər nazirlərinin və Fələstin prezidentinin müşaviri Hüseyn əl-Şeyxin imzaladığı məktubu ilk dəfə ABŞ-nin tanınmış mətbu orqanı olan “Axios” yayıb. Eyni zamanda həftə sonu Qahirədə yüksək səviyyəli diplomatların görüşündən sonra Trampın qəzzalıların köçürülməsi planına qarşı güclü regional müxalifətin olduğunu ABŞ rəsmilərinin diqqətinə çatdırılıb.
Belə olan surətdə ABŞ və İsrailin öz istəklərini fakt kimi təqdim etməkdə məqsədləri nədir? Və ya, həqiqətən, Tramp və Netanyahu ərəb dövlətlərinin onların planlarına razı olacaqlarını düşünürlər?
Hesab edirəm ki, ərəb ölkələrinin mövqeləri və bəyanatları həqiqətə daha yaxındır, nəinki ABŞ və İsrail rəhbərliyinin. Çünki qeyd olunan ərəb ölkələri elə ərəb-İsrail müharibələri başlayandan bəri İsrailin bu planına və ya Fələstinlilərin öz yerlərindən çıxarılması planına qarşı mübarizə aparmışlar.
Qəzzalıların Trampın planına uyğun Qəzzadan çıxarılması və ya buna təşəbbüs olunması Yaxın Şərqdə böyük təlatümlərin baş verməsinə səbəb ola bilər. Bu yeni Ərəb qışının qarşısında heç bir ərəb dövlət başçısının dayana bilməyəcəyi indidən məlumdur.
Vəziyyətin bu cür drammatik şəkildə inkişaf etməsi Səudiyyə Ərəbistanı Krallığı ilə İsrail arasında münasibətlərin yaradılmasına da ciddi mane olacağı proqnozlaşdırılır. Deməli,Trampın Qəzzalılarla bağlı köçürmə planı onun birinci dönəmdə müəyyən nəticələr əldə etdiyi İbrahim akkordunu təxirə sala bilər.
Almaz Nurağaqızı
siyasi analitik
11:10 06.02.2025
Oxunuş sayı: 9478
