Əlillərlə bağlı dəyişiklik: "Onların hüquqlarının müdafiəsi baxımından çox vacibdir"
“Əlilliyi olan şəxslərin hüquqları haqqında" qanuna Azərbaycan işarət dili anlayışı əlavə edilir. Həmçinin Azərbaycan qanunvericiliyində 18 yaşınadək əlilliyi müəyyən edilmiş şəxslər əlilliyi olan uşaqlar termini ilə əvəz edilir. Milli Məclisin Əmək və sosial siyasət komitəsinin bugünkü iclasında qeyd edilib ki, Azərbaycan işarət dili – eşitmə qabiliyyəti tam məhdud olan azərbaycandilli şəxslərin qollar, əllər və barmaqlardan eyni zamanda istifadə edilməklə fikirlərini ifadə etməsidir. Bununla yanaşı bütövlükdə qanun layihəsi Birləşmiş Millətlər Təşkilatının “Əlilliyi olan şəxslərin hüquqları haqqında” 2006-cı il tarixli Konvensiyasının tələbləri çərçivəsində istifadə edilən terminlərin uyğunlaşdırılmasını kompleks şəkildə nəzərə almaqla, normativ tənzimləmədə kolliziyanın yaranmamasını və nəticədə qanunvericilik sistemində əlilliyi olan uşaqlara münasibətdə terminoloji vahidliyi təmin edəcək.
Bəs Azərbaycan işarət dili ilə bağlı edilən dəyişikliklər hansı problemləri həll etməyə yönəlib? İşarət dili televiziyada da istifadə ediləcəkmi?
Mövzu ilə bağlı Milli Məclisin deputatı Vüqar Bayramov Crossmedia.az-a açıqlama verib:
“Təqdim olunan yeni layihələrdə əsasən iki istiqamətli dəyişikliklərin edilməsi nəzərdə tutulub. Onlardan biri Azərbaycanda işarət dilinin tətbiqi ilə bağlıdır. Bu əslində məhz yeni bir mexanizmin tətbiqi anlamına gəlir. Azərbaycanda işarət dilinin tətbiqi beynəlxalq konvensiyalara uyğun şəkildə həyata keçiriləcək. İşarət dilinin tətbiqi inkişaf etmiş dövlətlərdə olduğu kimi televiziya verilişlərində də istifadə ediləcək. Bu qərarın qəbul edilməsi əlillərin hüquqlarının müdafiəsi baxımından çox vacibdir”.
Deputat qəbul edilən digər dəyişiklikdən danışıb:
“Digər məqam da 18 yaşınadək əlilliyi müəyyən edilmiş uşaqların adlanma terminin dəyişməsi ilə bağlıdır. Buda beynəlxalq konvensiyalara uyğundur. Nəzərə almaq lazımdır ki, əlillik 18 yaşınadək müəyyən olunur. Praktik olaraq uşaqlıq dövründə əlilliyi müəyyən olunan şəxslər, əlilliyi müəyyən olunan uşaqlar kimi xarakterizə ediləcək və bu qanunda da öz əksini tapacaq. Bu dəyişikliklər Azərbaycan qanunvericiliyinin beynəlxalq konvensiyalara uyğunlaşdırılması məqsədi daşıyır”.
Ayhan Ağarzayev
17:31 05.02.2025
Oxunuş sayı: 4192
