Rusiyadan hiyləgər addım: "Ukrayna ərazisinin müxtəlif ölkələr tərəfindən bölünməsi mümkündür"
Rusiya və Ukrayna arasında gedən
müharibədə Rusiyanın siyasəti özünü hərtərəfli biruzə verir. Belə ki, Rusiyanın
Xarici Kəşfiyyat Xidmətinin direktoru Sergey Narışkin Ukrayna torpaqlarının
hüquqları mövzusunu müzakirə etməyi təklif edib: “Mən bu mövzunu müzakirə etməyi
təklif etdim, amma tarixi nöqteyi-nəzərdən başqa ölkələrdən, Polşadan,
Macarıstandan, Slovakiyadan tarixçiləri dəvət etməyə çalışacağıq. Gələcəkdə
Ukrayna ərazisinin müxtəlif ölkələr tərəfindən bölünməsi mümkündür”.
S. Narışkin bununla, Ukraynanın hazırkı
yerinin öz tarixi torpaqları olmadığını, həmin ərazilərin Rusiya və digər
Avropa dövlətləri arasında bölüşdürülməli olduğunu bildirir. Lakin o unudur ki,
tarixi sənədlər açılsa və ərazilərə hüquqi qiymət verilsə uduzan Rusiya özü olacaq.
Mövzu ilə bağlı politoloq Oqtay Qasımov Crossmedia.az saytına açıqlama verib:
"Narişkinin bu sözləri əslində beynəlxalq hüquqa tamamilə zidddir və tarixi ərazilər məsələsi beynəlxalq hüquqla uzlaşmayan bir termindir. Əgər tarixi məsələlər gündəmə gətirilsə, o zaman əslində ən çox peşman olan ölkə, bəlkə də, Rusiya olacaq. Çünki Rusiya özü keçmiş Xəzər xaqanlığı, Qıpçaq hakimiyyəti, Qızıl Ordanın ərazilərində yaranmış bir dövlətdir. Yəni bu cür absurd iddialarla çıxış etmək, əlbəttə, heç bir uğur qazandıra yaxud nəticə verə bilməz. Digər tərəfdən, Narışkinin bu təklifi həm də hiyləgər xarakter daşıyır. Belə ki, adıçəkilən ölkələrin bu və ya digər formada Ukrayna ərazilərinin bəzi hissələrinə müəyyən iddiaları var. Əslində Narişkin belə bir konfrans keçirməklə adları çəkilən ölkələrin müxtəlif tarixçilərini buraya dəvət edib. Guya, ümumiyyətlə Ukraynanın tarixin mövcud olmaması ilə bağlı faktları ortaya qoymağa, yaxud bunu sübut etməyə çalışır".
Politoloq bu açıqlamanı Rusiyanın işğalçılıq addımlarına bəraət adlandırıb:
"Bu, bütün hallarda heç bir
effekt verməyəcək. Bu gün faktiki olaraq Ukrayna beynəlxalq hüquqa görə hələ sovetlər
dönəmindən də BMT-nin üzvü kimi qeydiyyatdan keçib. Son 34 ildə özünün müstəqilliyini
əldə edib və dövlət kimi də fəaliyyət göstərir. Təbii ki, bu bəyanat və oxşar təkliflər
təxribat xarakteri daşıyır. Eyni zamanda Rusiyanın işğalçı iddialarına bəraət
almaq üçün edilən bir cəhddir".
Ayhan Ağarzayev
14:25 29.01.2025
Oxunuş sayı: 10028
