Türk Dünyası

Yeni dərsliklər təhsil sistemində nəyi dəyişəcək? - Nazirlik açıqlama verdi

Türk xalqlarının mədəni və təhsil sahəsində inteqrasiyasını gücləndirmək məqsədilə hazırlanmaqda olan “Türk dünyasının coğrafiyası” və “Ortaq türk ədəbiyyatı” dərs vəsaitləri üzv ölkələrin təhsil sistemində tədrisə daxil edilməyə hazırlaşır. Bu, Türk dövlətləri arasında inteqrasiya istiqamətində töhfədir. Əlbəttə, sözügedən dərs vəsaitləri Türk dövlətləri arasında müxətlif sahələrdə, o cümlədən mədəniyyət, ədəbiyyat kimi humanitar sahələrdə qarşılıqlı təcrübə mübadiləsinə, habelə, əməkdaşlığa şərait yaradır.

Crossmedia.az sözügedən təşəbbüslə ilə bağlı Elm və Təhsil Nazirliyindən bu layihələrin detallarına dair məlumat alıb.

Nazirliyin mətbuat xidmətindən bildirilib ki, “Türk dünyasının coğrafiyası” və “Ortaq türk ədəbiyyatı” dərs vəsaitlərinin hazırlanması zamanı Beynəlxalq Türk Akademiyasının təsdiq etdiyi mötəbər mənbələrdən istifadə olunub: ““Türk dünyasının coğrafiyası” dərs vəsaitinin yazılma məqsədi türk xalqlarının yaşadıqları geniş coğrafiya barədə təsəvvür yaratmaq, türklərin coğrafi anlayışlarını və ideyalarını tanıtmaqdır. Həmçinin müstəqil türk dövlətlərinin və muxtar respublikaların ümumi coğrafiyası barədə məlumat təqdim etməkdir. Dərslikdə türk dünyasına aid mədəniyyət abidələri, məşhur alim və səyyahların əsərlərindən fikirlər, eləcə də türk dövlətlərinin coğrafi xüsusiyyətləri ilə bağlı suallar yer alır.

“Ortaq türk ədəbiyyatı” dərs vəsaiti isə türk xalqlarının ədəbiyyatına dair geniş bir baxış təqdim edir. Bu dərslikdə türk ədəbiyyatının erkən dövrlərindən müasir milli ədəbiyyat nümunələrinə qədər olan dövr əks olunub. Həmçinin ortaq türk ədəbiyyatı və mədəni dəyərlər haqqında geniş məlumat verilib”.

Nazirlikdən həmçinin bildirilib ki, bu dərsliklərin Azərbaycan təhsil sisteminə uyğunlaşdırılması prosesi üzv ölkələrin – Azərbaycan, Qazaxıstan, Qırğızıstan, Türkiyənin mütəxəssislərinin iştirakı ilə həyata keçirilir: “Tarix, ədəbiyyat və coğrafiya üzrə ekspertlərin rəy və təklifləri nəzərə alınaraq Beynəlxalq Türk Akademiyasına təqdim edilib və təkmilləşdirilmələr aparılıb”.

Bundan əlavə, Elm və Təhsil Nazirliyi gələcəkdə digər ortaq dərsliklərin hazırlanması ilə bağlı hələlik yeni bir təklif irəli sürülmədiyini bildirib.

Nazirliyin mətbuat xidmətindən layihələrin əhəmiyyəti ilə bağlı da açıqlama verilib:

“Bu dərs vəsaitləri ortaq tariximiz, ədəbiyyatımız və coğrafiyamız barədə gənc nəslin maariflənməsinə dəstək göstərəcək, türk xalqları arasında ortaq dəyərləri daha dərindən anlamağa imkan yaradacaq, bu xalqların daha da yaxınlaşmasına şərait yaradacaqdır”.

Qeyd edək ki, “Ortaq türk tarixi”, “Ortaq türk ədəbiyyatı” və “Türk dünyasının coğrafiyası” dərsliklərinin mətnləri və proqramları 2022-ci ildə Beynəlxalq Türk Akademiyasının Nur-Sultanda keçirilən Elmi Şurasının 5-ci iclasında təsdiqlənmişdi. Üzv ölkələr bu dərsliklərin öz təhsil sistemlərində tədrisini təmin etmək öhdəliyi götürüblər. Dərsliklərin Azərbaycan dilinə tərcüməsindən sonra tam orta təhsil pilləsində tədris olunması məsələsi müzakirə ediləcək.

Nihat Tahirov

13:00 27.01.2025

Oxunuş sayı: 2138