Dünya

Rusiya – Ukrayna müharibəsinin nəticəsi ilə bağlı mümkün dörd ssenari açıqlanıb: Ərazi güzəşti...

The Times nəşri Ukraynada davam edən müharibənin dörd mümkün ssenarisini təqdim edib.

Crossmedia.az xəbər verir ki, məqalədə qeyd olunub ki, Ukraynanın 1991-ci il sərhədlərinə qayıtması ehtimalı çox aşağıdır.

Birinci ssenari məğlubiyyətdir. Bu halda, Ukrayna ABŞ-nin dəstəyindən məhrum qalaraq hərbi məğlubiyyətlə üzləşə bilər. Bu, milyonlarla ukraynalının qaçqın vəziyyətinə düşməsinə və ölkədə qalanların Rusiyanın həbsxanalarına salınmasına səbəb olacaq. NATO strateji mövqelərini itirəcək, Kremlin tankları isə Polşa sərhədlərinə qədər irəliləyəcək.

İkinci ssenari “pis sülh”dür. Bu, Qərbdən dəstək ala bilməyən Ukraynanın zəif mövqedən güzəştlərə getməsini, ölkənin parçalanmasını və Rusiyayönümlü hökumətin qurulmasını nəzərdə tutur. Üçüncü ssenari atəşkəsdir. Əgər bu, hərtərəfli sülh razılaşmasının bir hissəsi kimi həyata keçirilərsə, region stabilləşə bilər. Lakin müharibə yalnız “dondurularsa,” Rusiyanın zamanla yenidən hücuma keçməsi qaçılmaz olacaq. Dördüncü ssenari isə sülh sazişidir. Bu halda Ukrayna ABŞ-nin dəstəyi ilə güclü mövqedən danışıqlara gedəcək və ölkənin iqtisadi sabitliyini, suverenliyini və təhlükəsizlik təminatlarını təmin edən saziş bağlanacaq. Lakin nəşr bildirir ki, bu ssenaridə də 1991-ci il sərhədlərinə qayıtmaq ehtimalı çox azdır.