Pekin Vaşinqtona SƏRT MESAJ GÖNDƏRDİ: “Yalan ittihamları dayandırın, biolaboratoriyalarınızı açıqlayın!”
Vaşinqton digər ölkələrə qarşı yalan ittihamlar irəli sürməyi dayandırmalı və ABŞ-ın dünya üzrə bioloji laboratoriyalarının fəaliyyətinə dair məlumatları açıqlamalıdır.
Crossmedia.az xəbər verir ki, Çinin ABŞ-dakı səfirliyinin sözçüsü Lyu Pinyu bu fikirləri TASS-a açıqlamasında bildirib. O, ABŞ Mərkəzi Kəşfiyyat İdarəsinin (CIA) COVID-19 pandemiyasının Çinin Uhan şəhərindəki laboratoriyadan sızan virus nəticəsində yarandığı barədəki versiyanı dəstəkləməsi ilə bağlı yayılan xəbərləri şərh edərkən bu mövqeyi səsləndirib.
Diplomat vurğulayıb ki, ABŞ “digər ölkələri yalan ittiham etməkdən və qaralama kampaniyalarından dərhal imtina etməli, günahı başqalarının üzərinə atmaqdan çəkinməlidir”. O əlavə edib ki, Vaşinqton beynəlxalq ictimaiyyətin əsaslı narahatlıqlarına cavab verməli, Ümumdünya Səhiyyə Təşkilatına (ÜST) iddia edilən yoluxma halları ilə bağlı erkən məlumatlar təqdim etməli, Fort Detrik və digər bioloji laboratoriyalarının fəaliyyəti haqqında ətraflı məlumat açıqlamalı və dünya ictimaiyyətinə məsuliyyətli izahat verməlidir.
2021-ci ildə Çinin Xarici İşlər Nazirliyi bəyan etmişdi ki, ÜST, COVID-19-un ABŞ-ın Merilend ştatındakı Fort Detrik hərbi laboratoriyasından və ya oxşar müəssisələrdən sızması ehtimalını nəzərdən keçirməlidir. Fort Detrik Pentaqonun nəzdində fəaliyyət göstərən Walter Reed Hərbi-Tibbi Tədqiqat İnstitutuna ev sahibliyi edir və burada infeksion xəstəliklər də daxil olmaqla, biotibbi araşdırmalar aparılır.
Daha əvvəl The New York Times məlumat vermişdi ki, CIA bir neçə il ərzində virusun heyvandan insana təbii yolla keçib-keçmədiyini və ya laboratoriya sızıntısı nəticəsində yayıldığını müəyyən etmək üçün yetərli məlumatının olmadığını bildirmişdi. Nəşrin mənbələrinə görə, CIA-nın mövqeyindəki bu dəyişiklik yeni kəşfiyyat məlumatlarına deyil, mövcud informasiyanın daha diqqətlə təhlilinə əsaslanır.
Araşdırmaya keçmiş ABŞ Prezidenti Co Bayden administrasiyası dövründə başlanılıb və nəticələr hazırkı CIA direktoru Con Ratkliff tərəfindən açıqlanıb. O, əvvəllər Çinin COVID-19-un mənşəyini və virusun yayılma şəraitini gizlətdiyi üçün “cəzalandırılmalı” olduğunu bildirmişdi. The Wall Street Journal-ın məlumatına görə, CIA pandemiyanın laboratoriya sızıntısı nəticəsində baş verdiyini “ən ehtimal olunan versiya” kimi nəzərdən keçirsə də, bu nəticə hələ də dəqiq və qəti hesab olunmur.
Maral Şahverdili
19:20 26.01.2025
Oxunuş sayı: 2432
