Energetika Nazirliyində komitə iclası keçirilib
Energetika Nazirliyində “Elektroenergetika və bərpa olunan enerji” standartlaşdırılması üzrə Texniki Komitənin hibrid formatında növbəti iclası keçirilib.
İclas AZS EN 30-2-1:2024 - Qaz ilə işləyən məişət mətbəx texnikası – 2-1-ci hissə: Enerjidən səmərəli istifadə - Ümumi, AZS EN 15218:2024 - Məkanın soyudulması üçün buxar ilə soyutma kondensatorlu və elektrik intiqal kompressorlu kondisionerlər və mayeli soyuducu aqreqatlar - Terminlər, təriflər, sınaq şərtləri, sınaq üsulları və tələblər və AZS IEC 62512:2024 - Məişət qurutma funksiyalı elektrik paltaryuyan maşınlar – Effektivliyin ölçülməsi üsulları standartlarının layihələrinin müzakirəsi məqsədilə təşkil edilib.
İclası giriş sözü ilə açan Nazirliyin aparat rəhbərinin müavini - Texniki Komitənin sədri Xalidə Məsimova standartlaşdırmanın iqtisadiyyata, xüsusilə energetika sektorunun inkişafına verdiyi töhfələrdən bəhs edib. Bildirilib ki, energetika sektorunda tətbiq edilən avadanlıqların, məişətdə istifadə olunan məhsulların, eləcə də bu sahədə göstərilən xidmətlərin keyfiyyətinin təmin olunması və istehlakçıların hüquqlarının qorunması baxımından standartların tətbiqi müstəsna əhəmiyyət daşıyır.
Sonra Azərbaycan Standartlaşdırma İnstitutunun Strateji planlama və əlaqələndirmə şöbəsinin əməkdaşı Elman Əlixanov çıxış edərək hər üç standart layihəsinin hazırlanmış yekun variantı barədə geniş məlumat verib.
Sonda Texniki Komitənin üzvlərinin layihələrlə bağlı əlavə təklif və tövsiyələri dinlənilib, hər üç standart layihəsinin qısa müddət ərzində təkmilləşdirilərək qəbul olunması məqsədəmüvafiq hesab olunub.
12:56 21.01.2025
Oxunuş sayı: 4350
