Ümumxalq Hüzn Günü Düşənbədə qeyd olunub
Düşənbədə 20 Yanvar – Ümumxalq Hüzn Gününün 35-ci ildönümünə həsr olunmuş anım tədbiri və mətbuat konfransı keçirilib.
Bu barədə Azərbaycanın Tacikistandakı səfirliyindən məlumat verilib. Bildirilib ki, Azərbaycanın Tacikistandakı səfirliyinin təşkilatçılığı ilə baş tutmuş anım tədbirində əvvəlcə 20 Yanvar şəhidlərinin əziz xatirəsi bir dəqiqəlik sükutla yad edilib.
Azərbaycanın Tacikistandakı səfiri Əlimirzamin Əskərov 1990-cı il yanvarın 19-dan 20-nə keçən gecə keçmiş sovet ordusunun hərbi hissələrinin müstəqil dövlət yaratmaq və öz suverenliyini əldə etmək üçün Bakı şəhərində ayağa qalxan dinc əhaliyə qarşı misli görünməmiş qətliam törətdiyini, lakin bu qanlı cinayətin insanların azadlıq eşqini söndürə bilmədiyini, xalqımızın qanı bahasına da olsa, öz dövlət müstəqilliyinə qovuşduğunu diqqətə çatdırıb.
Mətbuat konfransı zamanı jurnalistlər 20 Yanvar faciəsi ilə yanaşı, Qazaxıstanda baş vermiş təyyarə qəzası, azərbaycanlıların Qərbi Azərbaycana qayıdış məsələsi, Azərbaycan və Ermənistan arasında sərhədlərin delimitasiyası ilə bağlı son işlər, Tacikistan-Azərbaycan əlaqələrinə dair suallar səsləndiriblər. Əlimirzamin Əskərov sualları ətraflı cavablandırıb.
Qeyd edilib ki, tədbir çərçivəsində səfirlikdə “Qanlı Yanvar”a həsr olunmuş guşə də yaradılıb və faciə ilə bağlı videoçarx nümayiş etdirilib. Guşədə 20 Yanvar faciəsi haqqında məlumatlar və hadisənin dəhşətli anlarını əks etdirən fotoşəkillər sərgilənib.
17:50 20.01.2025
Oxunuş sayı: 4393
