“Nyukasl Yunayted”in məğlubiyyətsizlik seriyası bitdi
“Nyukasl Yunayted” İngiltərə Premyer Liqasının növbəti turunda “Bornmut” ilə qarşılaşmadan məğlubiyyətlə ayrılıb. Ev sahibi komanda qələbə qazansa idi, ardıcıl qələbələr üzrə klub rekordu qıra bilərdi. “Bornmut”-a (1-4) hesabı ilə uduzan meydan sahiblərinin qapısında gördüyü 4 topdan 3-nü “Bornmut” klubunun istedadlı futbolçusu, hollandiyalı əfsanəvi oyunçu Patrik Klayvertin oğlu Castin Klayvert vurub. O, het-trik edərək komandasına növbəti 3 xalı qazandırıb.
Crossmedia.az “The Telegraph Sports”-a istinadən xəbər verir ki, Andoni İraloanın komandası möhtəşəm çıxış edərək, bu mövsümdə 2-ci dəfə het-trik edən Klayvertin liderliyində rəqibini məğlub edib.
Lakin komandada tək parlayan ulduz hollandiyalı hücumçu deyil. “Bornmut” hər sahədə Premyer Liqanın formda komandası “Nyukasl”-dan üstün olub. Bu qələbə ilə onlar Eddi Haunun komandasından cəmi bir xal geridə qərarlaşıblar.
Birinci hissədə “Bornmut” meydan sahiblərinə davamlı təzyiq göstərərək, onları səhv etməyə məcbur edib. “Nyukasl”ın müdafiədən oyun qurmağa çalışması isə Dan Börn və Levis Holl üçün çətin vəziyyət yaradıb. Holl, ehtimal ki, mövsümdə ən zəif oyununu keçirib. Bu haldan yararlanan “Bornmut” oyunçusu Deyvid Bruks müdafiəyə çətin anlar yaşadıb.
Nicat Rüstəmzadə
17:37 18.01.2025
Oxunuş sayı: 19372
