Məktəblərdə telefonlar qadağan edildi - MÜSAHİBƏ
Azərbaycanda 300 məktəbdə tədris prosesi zamanı telefon və digər ağıllı cihazlardan istifadə qadağan edilib. Bu addım şagirdlərin dərslərə daha çox fokuslanmasını təmin etmək və tədris keyfiyyətini artırmaq məqsədini güdür. Xüsusi hallar istisna olmaqla, ağıllı cihazların istifadəsi qadağan olunan təhsil müəssisələrində bu qərarın təsirləri geniş müzakirə olunur. Müəllimlər, valideynlər və şagirdlər arasında bu dəyişiklik müxtəlif reaksiyalara səbəb olub.
Mövzu ilə bağlı Crossmedia.az-a açıqlama verən təhsil eksperti, Bakı Dövlət Universitetinin dosenti Rəşad Qardaşovla telefon qadağasının təsirləri barədə ətraflı söhbət etdik.
- Telefon qadağası tədris keyfiyyətinə necə təsir göstərə bilər?
-Telefon rabitə vasitəsi və əlaqə qurmaq üçün istifadə olunarsa, tədrisə mənfi təsir göstərməz. Amma bu, düzgün koordinasiya edilməlidir. Məsələn, telefonlar əvvəlcədən yığılıb bir yerdə saxlanmalı və ya ümumiyyətlə məktəbə gətirilməməlidir.
- Bu qərar şagirdlərin texnologiyadan istifadəsi bacarıqlarına mənfi təsir edə bilərmi?
- Xeyr, bu qərar şagirdlərin texnoloji bacarıqlarını zəiflətməz. Hazırda məktəblərdə informatika dərsləri və kompüter zalları mövcuddur. Bu məkanlarda texnologiyadan məqsədyönlü istifadə təşviq edilir. Hətta internet resurslarını istifadə edərkən təyin edilmiş məhdudiyyətlər şaqirdlərin diqqətlərinə istiqamət verir.
- Elektron cihazların tam qadağan edilməsi, yoxsa məhdudlaşdırılması daha effektivdir?
-Elektron cihazlardan yalnız tədrisə yardımçı vasitə kimi istifadə olunmalıdır. Məsələn, dərs zamanı təqdimatlar və ya interaktiv tapşırıqlar üçün istifadə edilə bilər.
- Digər ölkələrin bu məsələdə təcrübəsi necədir?
- Müəyyən ölkələrdə bu cür qadağalar uğurlu olub. Məsələn, Çin və Yaponiyada şaqirdlərin smartfonlarla dərsə daxil olması qadağan edilib. Bu təcrübəni təbliğ edən maarifəndirici videoçarxlar şagirdlərin bu qaydalara adaptasiya olunmasına kömək edir.
- Şagirdlərdə texnologiya asılılığını azaltmaq üçün alternativ yollar varmı?
-Texnologiya asılılığı problemi əslində düzgün istifadədən qaynaqlanır. Texnologiyanı öz xeyrimizə istifadə etməliyik. Məsələn, karbon həm ucuz qrafit, həm də qiymətli almaz şəklində ola bilər. Fərqi yaradan onun istifadəsidir.
- Bu qadağa təhsil mühitində nizam-intizamı artırmağa necə kömək edə bilər?
-Əvvəlcə bu qərar bir qədər müqavimətlə qarşılanacaq, lakin zamanla normal qəbul ediləcək. Əks halda, monoton video məzmunlarla böyüyən bir nəsil yarana bilər. Bunun qarşısını almaq üçün televiziya, radio, uşaq ədəbiyyatı, muzey gəzintiləri, kitabxana bilgiləri, əlamətdar günlər, olimpiadalar və fənn gecələri önə çıxarılmalıdır.
- Bu proses digər məktəblərdə də tətbiq oluna bilərmi?
- Bəli, belə qaydalar birmənalı olaraq, bütün məktəblərdə tətbiq edilməlidir. Bu cür qərarlar ümumi təhsil keyfiyyətinin yüksəlməsinə kömək edəcək.
Rəşad Qardaşovun fikirlərinə əsasən, telefon qadağası düzgün tətbiq edildikdə şagirdlərin dərslərdə daha yaxşı nəticələr göstərməsi üçün şərait yarada bilər. Tədris mühitində bu cür dəyişikliklər digər məktəblər üçün də örnək ola bilər.
Nihat Tahirov
07:05 18.01.2025
Oxunuş sayı: 66437
