Bu orden indiyə qədər Misirdə heç bir əcnəbiyə verilməyib - Diaspor rəhbəri ilə müsahibə

 Ötən ayın 4-ü Azərbaycan diaspor tarixində daha bir qürurverici hadisə baş verib. Misir Prezidenti Əbdülfəttah əl-Sisi Azərbaycan diasporunun görkəmli nümayəndəsi, ərəb dünyasında ölkəmizin tanıdılması və elmi nüfuzunun yüksəldilməsi istiqamətində misilsiz xidmətləri olan tədqiqatçı-alim Seymur Nəsirovu I dərəcəli “Elm və fənlər” ordeni ilə təltif edib. Prezidentin ordeni şəxsən təqdim etməsi bu mükafatın yalnız fərdi xidmətlərin deyil, eyni zamanda Azərbaycan elmi-irsi və diaspor diplomatiyasının ərəb dünyasında qazandığı yüksək etimadın bariz göstəricisidir. Seymur Nəsirov təkcə alim kimi deyil, həm də 25 ildən artıqdır Misirdə Azərbaycan gerçəkliyini elmi əsaslarla təbliğ edən, iki ölkə arasında mədəni-intellektual körpü yaradan strateji fiqurlarından biridir. Onun əməyi nəticəsində yüzlərlə ərəb tədqiqatçısı Azərbaycan haqqında ilkin mənbələrə çıxış qazanıb, 65 ölkədən gələn minlərlə tələbə isə onun rəhbərliyi altında ölkəmizlə bağlı obyektiv informasiya mühitinə çıxıb.

Bu ordenin təqdimatı həm də Azərbaycan diaspor siyasətinin effektivliyinin, xalq diplomatiyasının real nəticələrinin beynəlxalq səviyyədə tanınmasıdır. Məhz bu baxımdan Seymur Nəsirovun mükafatı yalnız şəxsi nailiyyət deyil, Azərbaycan adına diplomatik və elmi qələbədir.

Misirdə Azərbaycan Diasporunun rəhbəri Seymur Nəsirov Crossmedia.az Analitik İnformasiya Portalına geniş müsahibə verib:

- Misir prezidenti tərəfindən mükafat aldınız. Bu mükafat sizə hansı fəaliyyətinizə görə təqdim olundu və bu hadisə sizin üçün nə ifadə edir?

- Əvvəla onu deyim ki, həqiqətən bir azərbaycanlı olaraq bu hadisə mənim üçün  çox qürur verici idi.  Qeyd edim ki, mənim ikili vətəndaşlığım yoxdur, Azərbaycan vətəndaşıyam. Bu gün Misirdə 10 milyondan çox əcnəbi yaşayır. Bu mükafatın on milyon əcnəbi içindən mənə verilməsi çox xoşdur. Bildiyim qədərilə indiyə qədər Misirdə yaşayan heç bir əcnəbiyə bu ali orden verilməyib. Eyni zamanda bu mükafatı mənə Misir prezidentinin özü şəxsən təqdim etdi. Bu mükafatın hansı fəaliyyətlərimə görə təqdiminə gələk. Mən 30 ildir Misirdə yaşayıram. Həm burada təhsil almışam həm də işləyirəm. 23 il öncə universiteti bitirdikdən sonra Misirdə tələbələri yetişdirmək məqsədi ilə, onların təqaüdünü, oxumağını, yaşayış yerini təşkil etmək üçün yaxın dostlarımla müəssisələr qurduq. Misirdə dünyanın ən qədim və böyük universitetlərindən biri olan “Əl-əzhər”də dünyanın 116 ölkəsindən 70 mindən çox tələbə yaşayır. Bu tələbələrin əksəriyyəti təqaüd proqramı ilə yox öz hesabı ilə oxuyur. Bu təşəbbüs məndən irəli gəlmişdi və bu layihələrə mən rəhbərlik edirdim. Hazırda 1700-dən çox tələbəm var. İlk olaraq binalar, daha sonra müəssisələr sonra isə fərdi müəssisələrdə layihələr təqdim etdim. Onlarda da öncədən xüsusən müəyyən  fənnlərin fəaliyyət göstərməsi məqsədilə təqribən 600 kv/m yer aldım və orada daha yaxşı səviyyədə həm yerli xalqa həm də Misirdə təhsil alan əcnəbilərə xidmət etməyə başladıq. Hazırda orada təsis etdiyimiz yerdə “Misir-Azərbaycan dostluq cəmiyyəti” fəaliyyət göstərir. Bu cəmiyyətin idarə heyətinin sədri mənəm. Bu cəmiyyətin nəzdindəki kurslarda 650-dən çox tələbə təhsil alır. Burada Azərbaycan dili, ərəb dili, ingilis dili, xalçaçılıq sənəti, muğam sənəti, Qurani-kərimin müxtəlif qiraətləri kimi fənnlər tədris olunur. Eyni zamanda aztəminatlı ailələrin uşaqlarına oxuma-yazma və müxtəlif peşələr öyrətməyə başladıq. Bu həqiqətən də Misir dövləti tərəfindən təqdir edilir. Qeyd edim ki, bütün bu fəaliyyətlər ödənişsizdir. Kurslarımızda olan istər yerli istər əcnəbi tələbələrin heç birindən ödəniş tələb olunmur. Ödəniş tələbi olmadığı üçün Misir-Azərbaycan dostluq cəmiyyəti olaraq Misirdə çox məşhurlaşdıq. Bunun üçün də inanıram ki, uzun müddətdir göstərdiyim bu fəaliyyət və tələbələrin yetişdirilməsi istiqamətində insanlığa fayda verəcək alimlərin yetişdirilməsində gördüyüm xidmətlərə görə Misir dövləti buna biganə qalmadı. Eyni zamanda bu mükafatın verilməsində ölkələrimiz arasında münasibətlərin yüksək səviyyədə olması, xalqlarımız arasında olan tarixi əsrlərlə ölçülən münasibətlər də böyük rol oynayır.

- Azərbaycan diasporunun Misirdəki fəaliyyəti barədə danışardınız. Hazırda oradakı azərbaycanlı icmasının əsas fəaliyyət istiqamətləri nələrdir?

- Sizə bir maraqlı hadisə danışım. Bundan təqribən 1 il öncə cənab səfirlə birlikdə jurnalistlər sindikatında Azərbaycanla bağlı bir tədbir var idi. Tədbirdə cənab səfirə belə bir sual verdilər ki, Azərbaycan diasporu Misirdə həddindən artıq məşhurdur, bu da o deməkdir ki, Misirdə xeyli sayda Azərbaycanlı yaşayır: Elə deyilmi? Cənab səfir gülümsəyərək dedi ki, Seymur müəllim bütün Misirdə elə ab-hava yaradıb ki, sanki Misirdə milyonlarla azərbaycanlı yaşayır. Halbuki Misirdə azərbaycanlıların sayı 200 nəfərdən çox deyil. Misir-Azərbaycan cəmiyyətinin aktiv fəaliyyəti, mediada mütəmadi olaraq bizim haqqımızda məlumatların yayılması Misirdə  böyük təqdirlə qarşılanır və ən məşhur diasporaların başında məhz Azərbaycan diasporu dayanır.

- Misirdə Azərbaycanı təbliğ etmək, milli kimliyi qorumaqda çətinliklər varmı?

- Azərbaycanı təbliğ etməkdə heç bir problem yoxdur. Misir xalqı da bizim kimi müsəlman xalqdır. Tarixən əlaqələrimiz də hər zaman yüksək səviyyədə olub. Biz təbliğatımızda Misirin baş həkimi, baş qazisi, Misiri düşmənlərdən azad edən əyyubilərin əslən Azərbaycandan olduğunu dəfələrlə qeyd etmişik və edirik. Bunlar da Azərbaycanı təbliğ etməkdə bizə böyük kömək olur. Tarixən xalqımızın igid qəhrəmanları Misirdə çox geniş fəaliyyətlər göstəriblər. Ona görə hər hansı təbliğatda problem yaşamırıq.

- Misir-Azərbaycan münasibətlərinin bugünkü səviyyəsini necə qiymətləndirirsiniz? İki ölkə arasında humanitar və mədəni əlaqələr hansı istiqamətdə inkişaf edir?

- Misir-Azərbaycan əlaqələri qədim zamanlardan yüksək səviyyədədir. Azərbaycanın son illərdə dünya çapında olan uğurlu xarici siyasəti Misir-Azərbaycan əlaqələrin yüksəlməsinə də böyük töhfələr verib. Xüsusən prezident İlham Əliyevin Misirə gəlməsi, Misir prezidentinin Azərbaycana səfəri bu əlaqələrin inkişafında böyük rol oynayıb. Bu gün Azərbaycan və Misir arasında siyasi əlaqələr ən yüksək səviyyədədir, mədəni, iqtisadi əlaqələr də inkişaf etməkdədir. Artıq biz neft sahəsində qurulan əməkdaşlığın genişləndiyini də görürük. İnanıram ki, yaxın gələcəkdə Azərbaycanla Misir arasında iqtisadi əlaqələr yüksək səviyyədə olacaq. Mədəni əlaqələrə gəlincə dəfələrlə Misirdə Azərbaycan günləri keçirilib. Azərbaycanda da Misir günləri keçirilir, kitablar çap edilir. Mədəni sahədədə də sürətlə inkişaf gedir. Tələbə mübadiləsi günü-gündən artır.

Müsahibəni hazırladı: Ayhan